ინფრასტრუქტურის მინისტრი ოთარ ფარცხალაძის დაკავებას არ გამორციხავს

რეგიონული განვითარებისა და ინფრასტრუქტურის მინისტრი მაია ცქიტიშვილი საქართველოს ყოფილი მთავარი პროკურორის ოთარ ფარცხალაძის დაკავებას არ გამორიცხავს. მაია ცქიტიშვილის განცხადებით, გამოძიებამ პასუხი უნდა გასცეს იმ შეკითხვებს, რომლებიც საზოგადოებაში ფარცხალაძესთან დაკავშირებით არსებობს.

მინისტრის შეფასებით, როგორც ჩანს ამ პერიოდის განმავლობაში სტანდარტებისა და პროცედურების დაცვით რომ წარდგენოდა ფარცხალაძეს ბრალი, ეს მომენტი დღეს დადგა. 

"არ გამოვრიცხავ არც დაპატიმრებას, არც სასჯელის სხვა ქმედებების შეფარდებას, მაგრამ ამ ნაწილშიც ისევ და ისევ სასამართლომ უნდა იმსჯელოს და ჩვენ გაქვს სხვადასხვა შემთხვევა, როდესაც პროკურატურის წარდგინებას არ დათანხმებია სასამართლო. ეს არის სწორედ რომ მართლმსაჯულების პრინციპი, სადაც პროკურატურა, საგამოძიებო ორგანოები მუშაობენ იმისთვის, რომ სასამართლოსთვის მისაღები სტანდარტით წარუდგინონ ბრალი და დაამტკიცონ ბრალი, და სადაც უკვე სასამართლოს უფლებამოსილებაა განიხილოს ყველა წარმოდგენილი არგუმენტი და მან იმსჯელოს ამა თუ იმ ადამიანის ბრალეულობასთან დაკავშირებით. მანამდე პრეზუმფცია უნდა დავიცვათ ყველამ და წინასწარ არ დავაბრალოთ ადამიანს", - განაცხადა ცქიტიშვილმა.

ოთარ ფარცხალაძეს ბრალი 5 ნოემბერს წარედგინა. 

არაოფიციალური ინფორმაციით,  ფარცხალაძეს ბრალი ყოფილი მთავარი აუდიტორის, ლაშა თორდიას ცემის საქმეზე წარედგინა.

2017 წლის 12 მაისს სახელმწიფო აუდიტის სამსახურის ხელმძღვანელ ლაშა თორდიას და ყოფილ მთავარ პროკურორ ოთარ ფარცხალაძეს შორის ინციდენტი მოხდა.

ლაშა თორდიას მტკიცებით, მას თავს ოთარ ფარცხალაძე და მისი თანმხლები რამდენიმე პირი დაესხნენ. სახელმწიფო აუდიტის სამსახურის ხელმძღვანელი მომხდარს მის მიერ სამსახურებრივი მოვალეობის შესრულებას უკავშირებს.

„ინტერპრესნიუსის“ ცნობით, თორდიას ადვოკატები ხვალ განცხადებას გააკეთებენ.

ოთარ ფარცხალაძე ქვეყნის მთავარ პროკურორად 2013 წლის 7 ნოემბერს დაინიშნა და იმავე წლის 30 დეკემბერს გადადგა. ის მთავარ პროკურატურას მხოლოდ 37 დღის განმავლობაში მართავდა და არც მანამდე და არც მერე პრესასთან საჯარო კომუნიკაციის სურვილი არ ჰქონია.

ფარცხალაძის გვარი დაკავშირებულია შს ყოფილი მინისტრის ივანე მერაბიშვილის საკნიდან შესაძლო გაყვანასთან, აუდიტის სამსახურის ყოფილ უფროსთან ლაშა თორდიასთან ფიზიკურ დაპირისპირებასთან და „ომეგა“ ჯგუფის საქმეში სპორტის ყოფილ მინისტრთან ასევე შესაძლო ფიზიკურ დაპირისპირებასთან.