პიროტექნიკის გაყიდვის რეგულაციები შესაძლოა კიდევ უფრო გამკაცრდეს

პიროტექნიკის გაყიდვის და გამოყენების რეგულაციები შესაძლოა, კიდევ უფრო გამკაცრდეს და „ადმინისტრაციულ სამართალდარღვევათა კოდექსში“ დამატებით ცვლილებები შევიდეს. სააგენტო „ინტერპრესნიუსის“ ცნობით,  ამის შესახებ გარემოს დაცვისა და ბუნებრივი რესურსების კომიტეტის თავმჯდომარემ, კახა კუჭავამ პარლამენტის იურიდიულ საკითხთა კომიტეტის სხდომაზე განაცხადა.

როგორც კუჭავამ აღნიშნა, ბევრია შემთხვევა, როდესაც იყიდება ისეთი პიროტექნიკა, რომელიც სტანდარტს არ აკმაყოფილებს და შემადგენლობაც არ არის ცნობილი. მისივე თქმით, კანონპროექტი დაჩქარებული წესით განიხილება.

„უსაფრთხოების წესების დაცვა პიროტექნიკის გამოყენებისას მნიშვნელოვანია და კანონპროექტი დაჩქარებული წესითაც კი გაგვაქვს, რომ ახალ წლამდე მოვასწროთ მისი განხილვა, ვიდრე მასიურად დაიწყება პიროტექნიკის გაყიდვა. თუმცა, ვთვლი, რომ ამ საკითხზე მუშაობა უნდა გაგრძელდეს შემდეგაც. პიროტექნიკის უსაფრთხოდ გამოყენებისას არა მხოლოდ არასრულწლოვნებზე უნდა ვიფიქროთ, არამედ ზრდასრულებზეც. სამწუხაროდ, ბევრია შემთხვევა, როდესაც ხდება ისეთი პიროტექნიკის გაყიდვა, რომელიც არანაირ სტანდარტს არ აკმაყოფილებს, შემადგენლობა არ არის ცნობილი. ყველა განვითარებულ ქვეყანაში ეს დარეგულირებულია და მათ შორის ადგილებიც კი არის, სადაც შეიძლება მოხდეს ფოიერვერკის გაშვება. პატარა ზომის პიროტექნიკაზე სულ სხვა რეგულაციაა და გაცილებით უფრო რთული და საფრთხის შემცველ პიროტექნიკაზე, სხვა რეგულაცია. ახალი წელი გავა, თებერვლიდან ისევ დაიწყება საპარლამენტო ცხოვრება და ამაზეც უნდა გაგრძელდეს მუშაობა“, - განაცხადა კახა კუჭავამ.

„ადმინისტრაციულ სამართალდარღვევათა კოდექსში“ ცვლილებები, რომლის მიხედვითაც, პიროტექნიკის 18 წლამდე პირებისთვის მიყიდვა იკრძალება და ადმინისტრაციული წესით დასჯადი ხდება, პარლამენტის იურიდიულ საკითხთა კომიტეტზე განიხილეს.

მომზადებული პროექტის გათვალისწინებით, პიროტექნიკური ნაკეთობის არასრულწლოვნისათვის მიყიდვა გამოიწვევს ფიზიკური პირის - 100 ლარით, ხოლო იურიდიული პირის 200 ლარით დაჯარიმებას. აღნიშნული ქმედების ერთი წლის განმავლობაში განმეორებით ჩადენა კი, გამოიწვევს ფიზიკური პირის - 200 ლარით, ხოლო იურიდიული პირის 400 ლარით დაჯარიმებას.

კანონპროექტის მიხედვით, ადმინისტრაციულ სამართალდარღვევათა ოქმებს ადგენს და საქმეებს იხილავს მუნიციპალიტეტის აღმასრულებელი ორგანოს შესაბამისი სამსახური ან მის მიერ უფლებამოსილი პირი.