უსუფაშვილი: მმართველი, რომელიც დამარცხებას დაუშვებლად მიიჩნევს, თავს გაინადგურებს

პარლამენტის ყოფილი თავმჯდომარე, "შენების მოძრაობის" ლიდერი დავით უსუფაშვილი "ქართული ოცნება - დემოკრატიული საქართველოს" თავმჯდომარის ბიძინა ივანიშვილის დღევანდელ განცხადებას Facebook-ზე ეხმიანება.

დავით უსუფაშვილის თქმით, მმართველი, "რომელიც დაუშვებლად მიიჩნევს შორეულ მომავალში დამარცხებასაც კი, „მარადისობას“ ელტვის და „თვითგანადგურებას“ აღწევს."

"მმართველი, რომელიც დაუშვებლად მიიჩნევს შორეულ მომავალში დამარცხებასაც კი, „მარადისობას“ ელტვის და „თვითგანადგურებას“ აღწევს. მისი ოცნება ძალაუფლებით არსებობის კიდევ რამდენიმე წამით, წუთით, წლით გახანგრძლივებით იფარგლება.

მისთვის თავისუფალი სახიფათოა, მორჩილი სასურველია, პრინციპული უმადურია, პატიოსანი სუსტია, ცბიერი ჭკვიანია, ზნეობა ტვირთია, კანონი სურვილია, სიკეთე იყიდება, ადამიანი თოჯინაა, ცხოვრება შურისძიებაა.

ამიტომ, მას მართლა და გულწრფელად არ ესმის, თუ რას აშავებს, როდესაც „მურუსიძის“, „ფარცხალაძის“, „სალომეს“, „გუნდის“, „ხაზარაძის“ საქმეებს „აკეთებს“...", - წერს დავით უსუფაშვილი სოციალურ ქსელში.

დღეს „ქართული ოცნების“ თავჯდომარის განცხადება გავრცელდა, რომელშიც ნათქვამია, რომ გადაწყვეტილება ეკა ბესელიას პარლამენტის იურიდიული კომიტეტის თავჯდომარის თანამდებობიდან გადადგომისა და პარლამენტის თავმჯდომარის მოადგილის პოზიციაზე გადანაცვლების თაობაზე ჯერ კიდევ ზაფხულში იქნა მიღებული.

"ქართული ოცნების“ თავმჯდომარის თქმით, გაუგებარი იყო ეკა ბესელიას განცხადება, როდესაც მან 27 დეკემბერს იურიდიული კომიტეტის თავმჯდომარის თანამდებობის დატოვება მოსამართლეების არჩევის საკითხს დაუკავშირა.

ამასთან, ივანიშვილის თქმით, მმართველმა გუნდმა მიიღო გონივრული გადაწყვეტილება, როდესაც მოსამართლეების არჩევის საკითხის განხილვისთვის მეტი დრო დაიტოვა. 

ეკა ბესელია ბიძინა ივანიშვილის განცხადებას უკვე გამოეხმაურა და აღნიშნა, რომ განცახდებას ამ თემაზე ორშაბათს გააკეთებს.

უზენაესი სასამართლოს მოსამართლეთა 10-კაციანმა სიამ საპარლამენტო უმრავლესობაში დაპირისპირება გამოიწვია. როგორც ეკა ბესელია ამბობს, პარლამენტში ამ სიის განხილვის პროცესის შესაჩერებლად მან იურიდიულ საკითხთა კომიტეტის თავმჯდომარის თანამდებობა დატოვა. თუმცა ამ განცხადებას არ ეთანხმება პარლამენტის თავმჯდომარე ირაკლი კობახიძე, ის ამბობს, რომ სიის განხილვის შეჩერება ბესელიას მიერ პოსტის დატოვებას არ შეეძლო. 

4 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.