რომელი ჯგუფი იმუშავებს და როდიდან უზენაესის მოსამართლეების შერჩევაზე

პარლამენტის საპროცედურო საკითხთა კომიტეტის თავმჯდომარე გიორგი კახიანი ამბობს, რომ უზენაესი სასამართლოს მოსამართლეთა კანდიდატების შერჩევის წესთან დაკავშირებით კონკრეტულ ცვლილებებზე საუბარი ახლა ნაადრევია. მისი თქმით, კრიტერიუმებსა და შერჩევის წესზე მუშაობას სპეციალური ჯგუფი დაახლეობით 10 დღეში დაიწყებს. ამის შესახებ გიორგი კახიანმა "ქრონიკის" ეთერში განაცხადა.

გიორგი კახიანის თქმით, საუბარია ისეთ სტანდარტებზე, რომელსაც ნებისმიერი მოსამართლე, მით უმეტეს უზენაესი სასამართლოს მოსამართლე, უნდა აკმაყოფილებდეს.

კახიანი ფიქრობს, რომ პარლამენტისთვის იუსტიციის უმაღლესი საბჭოს მიერ 10-კაციანი სიის წარდგენა, კანონდარღვევით არ მომხდარა, არამედ როგორც კახიანი ამბობს, კანონში გარკვეული ვაკუუმი აღმოჩნდა, რადგან პროცესი დაჩქარებულად, კანდიდატებზე ნაკლები მსჯელობის გარეშე მოხდა. კახიანის თქმით, სამართლებრივი ფილტრი, რომელსაც ყველა კანდიდატი უნდა გადიოდეს, უპირველეს ყოვლისა ჯერ თავად იუსტიციის საბჭოში უნდა იყოს მაღალი: "ჩვენ სწორედ ეს უნდა დავარეგულიროთ", - თქვა კახიანმა.

რაც შეეხება ჯგუფს, რომელმაც მოსამართლეობის კანდიდატების შესარჩევ კრიტერიუმებსა და წესზე უნდა იმუშაოს, გიორგი კახიანი ამბობს, რომ ამ თემაზე სასამართლო რეფორმების საკითხზე მომუშავე 40-კაციანი ჯგუფი იმუშავებს.

როგორც საპროცედურო საკითხთა კომიტეტის თავმჯდომარემ განმარტა, ამ ჯგუფში არიან როგორც საკანონმდებლო, ასევე აღმასრულებელი და სასამართლო ხელისუფლების წარმომადგენლები, მათ შორის იუსტიციის საბჭო სრულად. ასევე ჯგუფში არიან საერთაშორისო ორგანიზაციები და არასამთავრობო სექტორი.

"მე ვფიქრობ, უახლოეს 10 დღეში შეიკრიბება ეს ჯგუფი და შეიმუშავებს გარკვეულ პროექტს ან შეიძლება კანონპროექტს, რომელიც წარედგინება პარლამენტს და პარლამენტი იმსჯელებს შემდეგ ცვლილებეზე. თუ ეს კანონპროექტი იქნება, მაშინ მსჯელობა იქნება ორგანულ კანონში ამ ცვლილებებზე", - განაცხადა გიორგი კახიანმა.

რაც შეეხება ვადებს, გიორგი კახიანი ფიქრობს, რომ ამ ჯგუფს შესაბამისი პროექტის ან კანონრპექტის მოსამზადებლად 2-3 კვირა დასჭირდება, შემდეგ ეს უკვე წარედგინება პარლამენტს, რომელიც თებერვალში, საგაზაფხულო სესიის ფარგლებში დაიწყებს მსჯელობას. გიორგი კახიანის განმარტებით, თუ ეს პროექტი კანონპროექტის სახით იქნება, მაშინ პროცესი სრულად პარლამენტში, სავარაუდოდ თებერვლის ბოლოს დასრულდება კანონის მიღებით.

აქვე, გიორგი კახიანმა განმარტა, რომ პარლამენტში არ იქნება უზენაესი სასამართლოს მოსამართლეობის იმ 10-კაციან სიაზე მსჯელობა, რომელიც ახლაა შესული. არამედ, კახიანის თქმით, პარლამენტი იმსჯელებს მხოლოდ მოსამართლეობის მხოლოდ იმ კანდიდატებზე, რომლებსაც იუსტიციის უმაღლესი საბჭო ახალი კრიტერიუმებისა და წესის შესაბამისად შეარჩევს. თუ დღეს არსებული სიიდან რომელიმე კანდიდატი ახალ სამართლებრივ ფილტრს გაივლის, მაგ შემთხვევაში პარლამენტი იმსჯელებს ასეთ კანდიდატზე.

"არსებულ 10-კაციან სიაში არიან ისეთი კანდიდატები, რომელთა მიმართაც მე პირადად პოზიტიური დამოკიდებულება მაქვს, არიან ისეთებიც, რომლების მიმართაც კითხვები მაქვს და მაქვს არიან ისეთი კანდიდატები, რომელთა მიმართაც ნეგატიურად ვარ განწყობილი.

მიზანი ისაა, რომ ვიმსჯელოთ მხოლოდ იმ კანდიდატებზე, რომლებიც წარმოდგენილი იქნებიან ახალი წესით. არსებულ კანდიდატებზე საუბარი და განხილვა პარლამენტში არ იქნება. იქნება საუბარი მხოლოდ ახალ კანდიდატებზე, რომლებსაც იუსტიციის უმაღლესი საბჭო ახალი წესის შესაბამისად წარუდგენს პარლამენტს.

საბოლოო გადაწყვეტილებას პარლამენტი იღებს. არ ვიცი რომელი კანდიდატები დასახელდება განმეორებით ამ სიიდან, ეს ჩემი გადასაწყვეტი არაა. დარწმუნებული ვარ, რომ ის წესი, რომელიც შემუშავდება, იქნება საკმაოდ მკაცრი ფილტრი, რომ მართლაც ისეთი კანდიდატები იყვნენ წარმოდგენილი, რომლებსაც მაღალი კვალიფიკაცია გააჩნიათ და საზოგადოების მხრიდან გარკვეულწილად მაღალი ნდობა აქვთ",- განაცხადა გიორგი კახიანმა. 

"სასამართოს დამოუკიდებლობა ჩვენი მნიშვნელოვანი მონაპოვარია და ყველაფერს გავაკეთებთ იმისთვის, რომ ამას ჩრდილი არ მიადგეს. მაგრამ მნიშვნელოვანია ფაქტორია ისიც, რომ სასამართლოს მიმართ ნდობის მაღალი ხარისხი არსებობდეს. ამას კი პირველ რიგში მოსამართლეები თავისი საქმიანობით და რეპუტაციით ხელს უნდა უწყობდნენ.

პოლიტიკოსებმაც უნდა ავიღოთ ვალდებულება, რომ ჩვენი განცხადებებით რაიმე ჩრდილი არ მივაყენოთ სასამართლოს მიმართ ნდობას. მიზანი არის დამოუკიდებელი სასამართლო საზოგადოების მხრიდან მაღალი ნდობის ხარისხით", - განაცხადა გიორგი კახიანმა "ქრონიკის" ეთერში.

დღეს საქართველოს პარლამენტის თავმჯდომარე პარლამენტში იუსტიციის უმაღლესი საბჭოს მდივანს შეხვდა. 

კობახიძის თქმით, ორგანული კანონი დაადგენს მოსამართლეთა შერჩევის კრიტერიუმებს, კანონის ამ დებულებას ექნება უკუქცევითი ძალა და სწორედ ამ კრიტერიუმების მიხედვით იქნება წარმოდგენილი მოსამართლეთა განახლებული სია.

4 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

მოსამართლეთა სიამ მმართველ გუნდსა და საზოგადოებაში მწვავე კრიტიკა და დისკუსია გამოიწვია.