მალხაზ მაჩალიკაშვილი პარლამენტს დროებითი საგამოძიებო კომისიის შექმნას სთხოვს

მალხაზ მაჩალიკაშვილმა პარლამენტში განცხადება შეიტანა და თემირლან მაჩალიკაშვილის საქმეზე დროებითი საგამოძიებო კომისიის შექმნა მოითხოვა. 

მან განცხადება 150-ივე დეპუტატის სახელზე შეიტანა და თქვა, რომ იმედი აქვს, გამოჩნდებიან დეპუტატები, "ვისაც გულის სიღრმეში ადამიანური გრძნობები ექნებათ".

მალხაზ მაჩალიკაშვილის თქმით, მას ხელისუფლების მიმართ ნულოვანი მოლოდინი აქვს:

"ერთი წელია, გამწარებული ვითხოვ შეკითხვაზე პასუხს, რატომ მოკალით? მძინარე მოკალით, თუ ეღვიძა. ერთი წელია "სირაქლემის პოზიციაში" არიან, პასუხს არ მაძლევენ. იცით, რატომ? იმიტომ, რომ არ აქვთ პასუხი. დღესაც ვერ იპოვეს ადამიანი, ვინც თემირლანზე უარყოფითს იტყოდა და ადგნენ და ტერორისტად გამოაცხადეს", - თქვა მაჩალიკაშვილმა. 

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი 10 იანვარს საავადმყოფოში გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად.

მალხაზ მაჩალიკაშვილს თავისი შვილის, თემირლანის აჰმედ ჩატაევთან და ტერორისტებთან კავშირის არ სჯერა. ის გამოძიების ვერსიას რუსთაველის გამზირზე პარლამენტის შენობის წინ კარვებში მხარდამჭერებთან ერთად აპროტესტებს.