რომან კაკულია: ჩემი კომიტეტის სხდომა სამარცხვინო იყო

დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია მამუკა ხაზარაძესა და ბადრი ჯაფარიძეს ბოდიშს უხდის, კომიტეტის დღევანდელ სხდომას კი აფასებს როგორც სამარცხვინოს. ამის შესახებ რომან კაკულიამ „პალიტრანიუსის“ ეთერში განაცხადა.

რომან კაკულიას თქმით, კომიტეტზე ეროვნული ბანკის პრეზიდენტის მოსმენა რომ შემდგარიყო, ხვალ შესაძლოა "თიბისი ბანკს" ზიანი მისდგომოდა, რის გამოც კაკულიამ საკუთარ თავზე პასუხისმგებლობა ვერ აიღო. 

„თავიდან მქონდა ისეთი პოზიცია, რომ „რა დაშავდება შეკითხვების დასმით“, მაგრამ კობა გვენეტაძე ამტკიცებდა, რომ არ არის ის მოცემულობა, რომელიც დადებითი ზეგავლენის მომხდენია. შედეგად, მე საკუთარ თავზე უნდა ამეღო რისკი. ხვალ რომ „თიბის ბანკის“ აქციები დაცემულიყო, მაშინ კობა გვენეტაძეს უნდა ეთქვა: „თქვენ რომ კომიტეტზე არ განგეხილათ ეს საკითხი, მაშინ „თიბისი ბანკის“ აქციები იქნებოდა ისევ წესრიგში და ეს თქვენი ბრალია“. ამას ხომ არ ავიღებდით ჩვენს თავზე? ასე დასვა სებ-ის პრეზიდენტმა საკითხი და ჩვენც შესაბამისად ვუპასუხეთ.

ბოდიშს ვუხდი მამუკა ხაზარაძესა და ბადრი ჯაფარიძეს. ჩემი ჩანაფიქრი კი არ იყო მათთვის სიტყვის არ მიცემა, უბრალოდ სიტუაცია ასეთნაირად წავიდა", - განაცხადა რომან კაკულიამ.

რომან კაკულიას თქმით, მისი კომიტეტის სხდომა სამარცხვინო იყო და ასეთი სხდომებით ქვეყანა ვერ აშენდება. 

„ახლა ერთმანეთს ვინ ვაჯობებთ, არავის აღარ აინტერესებს უკვე. ჩვენ ვაჯობებთ ნაციონალებს, ნაციონალები გვაჯობებენ ჩვენ, „პატრიოტები“ როგორ იძიებენ ვიღაცაზე შურს თუ როგორ იქნება - ეს ხალხს აღარ აინტერესებს. საზოგადოებას უნდა მშვიდობაზე ორიენტირებული, გამაერთიანებელი ძალა, რომელიც ლიბერალსაც და კონსერვატორსაც ერთად დასვამს და ერთმანეთთან დიალოგს ასწავლის.

წასული პოლიტიკაა ასეთი საუბრები, რასაც ჩვენ ვხედავთ. ჩემი კომიტეტის სხდომა, ჩემი აზრით, სამარცხვინო იყო დღეს, ჩემთვისაც და ყველასთვისაც, იმ გაგებით, რომ ქვეყანა ასეთი სხდომებით ვერ აშენდება. კი ბატონო, ვიღაცამ თავისთვის მეტი ქულა ჩაიწერა, ვიღაცამ ნაკლები, მაგრამ ქვეყანას რა აქედან?!“, - განაცხადა რომან კაკულიამ.

კომიტეტში ჩაშლილი სხდომის მიუხედავად, მამუკა ხაზარაძე და ბადრი ჯაფარიძე მზად არიან პარლამენტში ხელმეორედ მივიდნენ. ამის შესახებ ხაზარაძემ Facebook-ზე დაწერა.

დარგობრივი ეკონიმიკის კომიტეტის სხდომაზე დღეს მამუკა ხაზარაძისა და ბადრი ჯაფარიძისთვის უნდა მოესმინათ, თუმცა დეპუტატები ვერ შეთანხმდნენ, რა ფორმატში უნდა ემსჯელათ "თიბისის საქმეზე". 

საკანონმდებლო ორგანოში მივიდა ეროვნული ბანკის პრეზიდენტი, მიუხედავად იმისა, რომ კობა გვენეტაძეს ამ ფორმატში „თიბისიზე“ საუბარი მიზანშეწონილად არ მიაჩნდა. საბოლოოდ, ამ თემაზე ვერც ისაუბრეს, რადგან კომიტეტის სხდომა ჩაიშალა.