მამუკა ხაზარაძე პარლამენტში ხელახლა მისასვლელად მზადაა

მამუკა ხაზარაძე მზად არის პარლამენტში ხელმეორედ მივიდეს და დეპუტატების შეკითხვებს უპასუხოს. ამის შესახებ მან Facebook-ზე დაწერა.

მამუკა ხაზარაძის თქმით, დღეს, დარგობრივი ეკონომიკის კომიტეტის სხდომაზე მას საკუთარი სათქმელის თქმის შესაძლებლობა არ მიეცა. ამიტომ ის და ბადრი ჯაფარიძე მზად არიან კიდევ ერთხელ მივიდნენ პარლამენტში და პოზიცია „საჯარო ტრიბუნიდან დააფიქსირონ“.

„როგორც თქვენთვის ცნობილია, დღეს პარლამენტის დარგობრივი ეკონომიკის კომიტეტის სხდომა არ შედგა და არ მომეცა საშუალება გამოვსულიყავი და მეთქვა ჩემი სათქმელი. ჩვენ მზად ვართ შესაბამის საპარლამენტო კომიტეტში კიდევ ერთხელ მივიდეთ, რათა დავაფიქსიროთ ჩვენი პოზიცია საჯარო ტრიბუნიდან.

რადგან ეს ცდება ერთი და ორი ადამიანისა თუ ინსტიტუტის საკითხს და ეხება მთლიანად ქვეყანას და ამასთან ძალიან მაღალია საზოგადოების ინტერესი, ველოდებით კონკრეტულ შემოთავაზებას უმაღლესი საკანონმდებლო ორგანოსგან უახლოეს დღეებში. იმედია, მალე გაირკვევა სიმართლე და არ შეიქმნება ვითარება შემდგომი გაუგებრობისა და სპეკულაციებისთვის“, - წერს მამუკა ხაზარაძე Facebook-ზე.

დარგობრივი ეკონიმიკის კომიტეტის სხდომაზე დღეს მამუკა ხაზარაძისა და ბადრი ჯაფარიძისთვის უნდა მოესმინათ, თუმცა დეპუტატები ვერ შეთანხმდნენ, რა ფორმატში უნდა ემსჯელათ "თიბისის საქმეზე". 

საკანონმდებლო ორგანოში მივიდა ეროვნული ბანკის პრეზიდენტი, მიუხედავად იმისა, რომ კობა გვენეტაძეს ამ ფორმატში "თიბისიზე" საუბარი მიზანშეწონილად არ მიაჩნდა. საბოლოოდ, ამ თემაზე ვერც ისაუბრეს, რადგან კომიტეტის სხდომა ჩაიშალა.

პროცედურულ საკითხებთან დაკავშირებით ხანგრძლივი და ხმამაღალი დისკუსიის შემდეგ კომიტეტის თავმჯდომარემ სხდომა დასრულებულად გამოაცხადა.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.