კოვზანაძე: საფინანსო-საბიუჯეტო კომიტეტი მზადაა მამუკა ხაზარაძისა და ბადრი ჯაფარიძის მოსმენა მოაწყოს

საქართველოს პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ  თქვა, რომ საფინანსო-საბიუჯეტო კომიტეტს შეუძლია, მამუკა ხაზარაძისა და ბადრი ჯაფარიძის მოსმენა მოაწყოს.

"მამუკა ხაზარაძემ საჯაროდ განაცხადა, რომ პარლამენტში მოსვლა სურთ, რათა კანონმდებლებს გარკვეული ინფორმაცია გააცნონ. უპირველეს ყოვლისა, საფინანსო-საბიუჯეტო კომიტეტს, როგორც პროფილურ კომიტეტს, შეუძლია, მოაწყოს ეს შეხვედრა და გავეცნოთ იმ მასალებსა და წინადადებებს, რისი გადმოცემაც მათ უნდათ. აქედან გამომდინარე, ვთქვი, რომ ჩვენი კომიტეტი არის ღია, შეგვიძლია, მოვაწყოთ ეს მოსმენა დროის შესაბამის მონაკვეთში, რომელზეც შევთანხმდებით. ეს შეხვედრა შეიძლება, მოეწყოს და მოვისმინოთ ის წინადადებები, სურვილები და გულისტკივილი, რაც მამუკა ხაზარაძესა და ბადრი ჯაფარიძეს აქვთ, ჩვენ ჩვენი წინადადებები, კითხვები და სურვილები გავაცნოთ“,- განაცხადა ირაკლი კოვზანაძემ.

გუშინ ხმაური იყო პარლამენტში, დარგობრივი ეკონიმიკის კომიტეტის სხდომაზე. კანონმდებლები ფორმატზე ვერ შეთანხმდნენ, ანუ რა ფორმატში უნდა ემსჯელათ თიბისი ბანკის საქმეზე.  მოგვიანებით გაირკვა, რომ მამუკა ხაზარაძე მზად არის პარლამენტში ხელმეორედ მივიდეს და დეპუტატების შეკითხვებს უპასუხოს.

საკანონმდებლო ორგანოში მივიდა ეროვნული ბანკის პრეზიდენტი, მიუხედავად იმისა, რომ კობა გვენეტაძეს ამ ფორმატში "თიბისიზე" საუბარი მიზანშეწონილად არ მიაჩნდა. საბოლოოდ, ამ თემაზე ვერც ისაუბრეს, რადგან კომიტეტის სხდომა ჩაიშალა.

პროცედურულ საკითხებთან დაკავშირებით ხანგრძლივი და ხმამაღალი დისკუსიის შემდეგ კომიტეტის თავმჯდომარემ სხდომა დასრულებულად გამოაცხადა.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.