ხელისუფლების წარმომადგენლები ახალი ზელანდიის ტერაქტს ეხმიანებიან

ახალ ზელანდიაში განვითარებულ მოვლენებს საქართველოს ხელისუფლების წარმომადგენლები სოციალურ ქსელში გამოეხმაურნენ.

საქართველოს პრეზიდენტმა სალომე ზურაბიშვილმა ახალ ზელანდიას სამძიმარი გამოუცხადა და მსოფლიო მასშტაბით მუსლიმთა გაერთიანებას თანადგომა აღუთქვა.

„ახალ ზელანდიაში 49 მოქალაქის საზარელი მკვლელობა ტერორისტული აქტია, რომელსაც მსოფლიო მასშტაბით მოჰყვა რეზონანსი. საქართველო ზელანდიელი ხალხისა და მსოფლიო მასშტაბით მუსლიმთა გაერთიანების გვერდით დგას. იმედი მაქვს ტერორიზმის ტრაგედია ერთხელ და სამუდამოდ ყველასთვის აღმოიფხვრება“, - წერს სალომე ზურაბიშვილი მიკრობლოგ Twitter-ზე. 

The senseless murder of 49 civilians in #NewZealand today is an act of terror that resonates across the world. Georgia stands with the people of New Zealand and the Muslim community across the globe, in hopes that the tragedy of terrorism is eradicated soon, once and for all

— Salome Zourabichvili (@Zourabichvili_S) March 15, 2019

ახალი ზელანდიის ქალაქ ქრაისტჩარჩში, ორ მეჩეთზე თავდასხმას გამოეხმაურა საქართველოს საგარეო საქმეთა მინისტრიც. დავით ზალკალიანმა მიკრობლოგ Twitter-ზე მომხდარის გამო მწუხარება გამოთქვა და დაღუპულთა ოჯახის წევრებს მიუსამძიმრა. 

„საქართველო გმობს ახალი ზელანდიის ქალაქ ქრაისტჩარჩში ორ მეჩეთზე თავდასხმას. ახალ ზელანდიას თანადგომას ვუცხადებთ. ვუსამძიმრებთ დაღუპულთა ოჯახის წევრებს“, - წერს დავით ზალკალიანი მიკრობლოგ Twitter-ზე.

#Georgia strongly condemns the hideous attack on two mosques in #christchurch #NewZealand. Our thoughts are with  the people of New Zealand, our condolences to the families of the victims. @MFATgovtNZ

— David Zalkaliani (@DZalkaliani) March 15, 2019

ბოლო ინფორმაციით, ახალ ზელანდიაში, ქალაქ ქრაისტჩარჩში, ორ მეჩეთზე თავდასხმის შედეგად 49 ადამიანი დაიღუპა და სულ მცირე, 20 დაშავდა. ახალი ზელანდიის პრემიერმინისტრმა თავდასხმას ტერორისტული აქტი უწოდა, რომელიც „მემარჯვენე ექსტრემისტმა“ ჩაიდინა. პოლიციის ინფორმაციით, დაკავებულია 4 ადამიანი, 3 კაცი და 1 ქალი. 

ტერორისტული აქტიდან მალევე ბრიტანულმა გამოცემა Daily Mail-მა ტერაქტის ადგილიდან ამოღებული იარაღის ვიზუალური მასალა გამოაქვეყნა, სადაც ჩანს, რომ იარაღს დავით აღმაშენებელი და დავით სოსლანი აწერია.

სუსმა ახალ ზელანდიაში ნაპოვნ ქართულწარწერიან იარაღზე სტრატეგიულ პარტნიორებს უკვე მიმართა.