ოხანაშვილი: ანა დოლიძის და ნაზი ჯანეზაშვილის წინადადება შეიძლება კანონპროექტში აისახოს

იურიდიული კომიტეტის სხდომაზე ნაზი ჯანეზაშვილის და ანა დოლიძის პროექტზეც იმსჯელეს და მმართველ გუნდში აღნიშნეს რომ მათ წინადადებებს გაითვალისწინებენ. ჯანეზაშვილის და დოლიძის საკანონმდებლო  წინადადების მთავარი მიზანია, შეიცვალოს უზენაეს სასამართლოში მოსამართლეთა კანდიდატების წარდგენის ფორმა, დაინიშნოს კონკურსი, რომელიც იქნება ღია და გამჭვირვალე. საბჭოს არამოსამართლე წევრი ანა დოლიძე აცხადებს, კანდიდატებთან გასაუბრება უნდა იყოს საჯარო, რომელსაც ყველა მოქალაქე ნახავს.

„ნაზი ჯანეზაშვილის და ანა დოლიძის მიერ მომზადებული მთელი რიგი საკითხები შესაბამისობაშია და ემთხვევა საპარლამენტო უმრავლესობის მიერ დარეგისტრირებულ საკანონმდებლო პაკეტს. გვქონდა საინტერესო და კონსტრუქციული მსჯელობა მთელ რიგ თემებთან დაკავშირებით და ვფიქრობთ, რომ ის საკითხები, რაც შემოთავაზებულია ამ წინადადებაში, შესაძლოა, ასახული იყოს ჩვენს პროექტში. ვნახოთ, ამაზე ვიმსჯელებთ. ვაგრძელებთ მუშაობას ამ პაკეტზე, ორშაბათს განიხილება საკითხი წამყვან იურიდიულ კომიტეტზე. რაც შეეხება მსგავსებებს, საუბარია ინტერსთა კონფლიქტზე, რაზეც ბევრი მსგავსებაა. საუბარია ასევე იმაზე თუ რა სახის ინფორმაცია უნდა იყოს წარდგენილი მოსამართლეობის კანდიდატების შესახებ“, - განაცხადა ოხანაშვილმა.

ოპოზიციის კანონპროექტის მთავარი პრინციპი იუსტიციის საბჭოს ყველა წევრისთვის კანდიდატის დასახელების უფლების ქონაა. მმართველი გუნდი ამბობს, რომ ოპოზიციის კანონპროექტი სამართლებრივად სუსტია და ის ასევე ეწინააღმდეგება კონსტიტუციას. ამასთან დაკავშირებით იურიდიულ სხდომაზე დღეს მხარეებს შორის სიტყვიერი დაპირისპირება მოხდა.

ოთარ კახიძე აცხადებს, რომ მათი კანონპროექტის მთავარი არსი არის ის რომ პარლამენტში არ შევიდეს გაფლიტრული სია.  მამუკა მდინარაძის თქმით, კანონპროექტის მიხედვით, რომელიც „ევროპულ საქართველოს“ სურს პარლამენტში შეიტანოს, დეპუტატებს 252 მოსამართლეობის კანდიდატის განხილვა მოუწევს.

დღევანდელ დღის წესრგიში ეკა ბესელიას კანონპროექტზეც მსჯელობაც იყო დაგეგმილი, თუმცა ბესელია არ გამოეცხადა და არც იმის საფუძველი უთქვამს თუ რატომ არ მივიდა.

რაც შეეხება თავად მმართველი გუნდის მიერ ინიცირებულ კანონპროექტს იურიდიული კომიტეტი ორშაბათს, 18 მარტს იმსჯელებს. 

4 მარტს უმრავლესობა მოსამართლეთა შერჩევის კრიტერიუმებსა და პროცედურებზე შეთანხმდა.

მოსამართლეების შერჩევის კრიტერიუმებისა და ამ მიმართულებით მიმდინარე პროცესების გამო "ქართული ოცნება" რამდენიმე დეპუტატმა დატოვა, რის შედეგადაც პარტიამ პარლამენტში კონსტიტუციური უმრავლესობა დაკარგა. ეს პროცესი მმართველი ძალის ირგვლივ ჯერ კიდევ გასულ წელს დაიწყო, როცა უზენაესი სასამართლოს მოსამართლეების 10-კაციანი სია საჯარო გახდა.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. მოგვიანებით, მოსამართლეებმა კანდიდატურები მოხსნეს და შეიქმნა სამუშაო ჯგუფი უზენაესი სასამართლოს მოსამართლეების კანდიდატების შერჩევის კრიტერიუმების დასადგენად.