„ინტერმედია პლუსის“ ყოფილი მეწილე: „რუსთავი 2“-ს ჩვენთან თანამშრომლობით არ უზარალია

„ინტერმედია პლუსის“ ყოფილი მეწილე კახაბერ ანჯაფარიძე ამ წუთებში გამოძიების შეკითხვებს პასუხობს. ის პროკურატურაში მოწმის სტატუსითაა დაბარებული. საგამოძიებო უწყებაში შესვლამდე, „ინტერმედია პლუსის“ ყოფილმა მეწილემ მედიასთან კომენტარი გააკეთა. როგორც კახაბერ ანჯაფარიძე აცხადებს, „რუსთავი 2“-ს მის კომპანიასთან თანამშრომლობით არ უზარალია. 

„ეს არის აბსურდი და ამ საქმეს სამართლებრივი შინაარსი არ გააჩნია“, - განმარტა ანჯაფარიძემ.

„ინტერმედია პლუსის“ ყოფილი მეწილის თქმით, ნიკა გვარამია მისი უახლოესი მეგობარია და მას ეს მხოლოდ ეამაყება.

რაც შეეხება საქმით პროკურატურის დაინტერესებას, ანჯაფარიძე არ ელოდება, რომ კომპანიის რომელიმე თანამშრომლის პასუხისმგებლობის საკითხი დადგეს, თუმცა იმასაც ამბობს, რომ „დღევანდელი რეალობიდან გამომდინარე არაფერს გამორიცხავს“.

კახაბერ ანჯაფარიძე საგამოძიებო უწყებაში საკუთარ ადვოკატთან ერთად მივიდა. მის ინტერესებს დიმიტრი საძაგლიშვილი იცავს. ადვოკატი ამბობს, რომ საგამოძიებო ორგანოს რა კითხვები ექნება არ იცის, თუმცა ისინი მზად არიან ყველანაირი ინფორმაცია მიაწოდონ. საძაგლიშვილის განმარტებითვე, გაფორმებული კონტრაქტის გამო სამაუწყებლო კომპანია „რუსთავი 2“- ს არ უზარალია.

საქართველოს გენერალურმა პროკურატურამ „ინტერმედიას“ ერთ-ერთი მეწილე, კახაბერ ანჯაფარიძე გამოკითხვაზე დაიბარა.

პირველ აგვისტოს „რუსთავი2“-ის კონტრაქტორ „ინტერმედიას“ სათავო ოფისიდან პროკურორებმა დოკუმენტაცია წაიღეს და მისი შესწავლა დაიწყეს. საუბარია 2013 წლიდან დღემდე შესრულებულ ტრანზაქციებზე. იმავე საღამოს გენერალურ პროკურატურაში მიმდინარე გამოძიების ფარგლებში „ინტერმედიას“ დირექტორი ზურაბ იაშვილი დაკითხეს.