პროკურატურა: ხაზარაძე ე.წ. მუქარის წერილის საქმეზე გამოძიებას განზრახ აფერხებს

მამუკა ხაზარაძემ თავად განზრახ შეაფერხა გამოძიება ე.წ. მუქარის წერილის საქმეზე, როდესაც არ ითანამშრომლა გამოძიებასთან, მოსამართლის წინაშე დაკითხვისას არ წარმოადგინა ე.წ. წერილის ორიგინალი და ამასთან, კატეგორიული უარი განაცხადა შუამავლის დასახელებაზე, რის გამოც პროკურატურა მოკლებულია შესაძლებლობას, დანიშნოს შესაბამისი ექსპერტიზები ე.წ. წერილთან დაკავშირებით და გამოკითხოს მოწმეები. ინფორმაციას ამის შესახებ საქართველოს გენერალური პროკურატურა ავრცელებს.

„ერთ-ერთი ტელეკომპანიის ეთერში უკანონო შემოსავლის ლეგალიზაციაში ბრალდებულმა მამუკა ხაზარაძემ, არასწორი ფაქტების დასახელებით კიდევ ერთხელ სცადა საზოგადოების შეცდომაში შეყვანა. აღნიშნული საქმისადმი საზოგადოების ინტერესის გათვალისწინებით, საქართველოს პროკურატურა საჭიროდ მიიჩნევს, კიდევ ერთხელ განმარტოს ის მნიშვნელოვანი საკითხები, რომელთა შესახებ ბრალდებული ხაზარაძე საუბრობს.

არაერთხელ აღინიშნა, რომ სიმართლეს არ შეესაბამება მამუკა ხაზარაძის განცხადებები, თითქოს პროკურატურამ არ დაიწყო გამოძიება ე.წ. წერილთან დაკავშირებით. მამუკა ხაზარაძის მიერ წარმოდგენილი „დოკუმენტი” დაუყონებლივ დაერთო მოქმედ სისხლის სამართლის საქმეს, რაც პროცესუალურად ნიშნავს, რომ მასზე გამოძიება დაწყებულია და გრძელდება. გამოძიების მიმდინარეობის კიდევ ერთი დასტურია ის გარემოება, რომ მამუკა ხაზარაძე ამ ფაქტზე სასამართლოში გამოიკითხა მოწმის სახით. მოქმედი სისხლის სამართლის საპროცესო კოდექსის თანახმად, მოწმე იკითხება მხოლოდ მოქმედი, დაწყებული გამოძიების ფარგლებში.

ამ ეპიზოდის სრულყოფილად და ობიექტურად გამოძიება განზრახ შეაფერხა თავად მამუკა ხაზარაძემ, რომელმაც არ ითანამშრომლა გამოძიებასთან, მოსამართლის წინაშე დაკითხვისას არ წარმოადგინა ე.წ. წერილის ორიგინალი და ამასთან, კატეგორიული უარი განაცხადა შუამავლის დასახელებაზე. ამის გამო პროკურატურა მოკლებულია შესაძლებლობას, დანიშნოს შესაბამისი ექსპერტიზები ე.წ. წერილთან დაკავშირებით და გამოკითხოს მოწმეები.

ამასთან ერთად, გაუგებარი და სამართლებრივ ჩარჩოებს აცდენილია ბრალდებულ მამუკა ხაზარაძის მოთხოვნები იმის შესახებ, რომ იგი მხოლოდ განსაკუთრებული წესით წარმართულ საგამოძიებო მოქმედებებში მიიღებს მონაწილეობას. ეს პოზიცია სრულ წინააღმდეგობაში მოდის მოქმედი სისხლის სამართლის მატერიალურ და საპროცესო კოდექსებთან.

უკანონო შემოსავლის ლეგალიზაციის საქმეზე პროკურატურა გამოძიებას აწარმოებს კანონმდებლობის სრული შესაბამისობით და არანაირი საგამონაკლისო წესი პიროვნების საზოგადოებრივი, პოლიტიკური თუ ქონებრივი სტატუსის მიუხედავად არ დაიშვება“, - ნათქვამია პროკურატურის განცხადებაში.

„თიბისი ბანკის“ დამფუძნებელმა მამუკა ხაზარაძემ განაცხადა, რომ წინასაარჩევნოდ მას გიორგი გახარიამ, რომელიც მაშინ შინაგან საქმეთა მინისტრის პოსტს იკავებდა, მუქარის წერილი გაუგზავნა. გახარიამ ასეთი წერილის არსებობა გამორიცხა. ამ ბრალდებასთან დაკავშირებით ხაზარაძე თბილისის საქალაქო სასამართლოში მოსამართლის თანდასწრებით გამოკითხეს. მან სასამართლოში წერილის ასლიც მიიტანა, რომელიც პროკურატურამ გაასაჯაროვა და განაცხადა, რომ ორიგინალი ექსპერტიზისთვის დიდ ბრიტანეთში გაგზავნა.

11 სექტმბერს მამუკა ხაზარაძის ადვოკატმა, ზვიად კორძაძემ განაცხადა, რომ „მუქარის წერილზე“ ინგლისში ჩატარებული ექსპერტიზის შედეგად ათობით თითის ანაბეჭდი იპოვეს და ის ექსპერტიზის შედეგებს პროკურატურას გადასცემს.