სოფო კილაძე: მარგველაშვილის და ზურაბიშვილის შემთხვევაშიც ყველაფერს თავის სახელს ვარქმევთ

„მარგველაშვილის და ზურაბიშვილის შემთხვევაშიც ორივე მიმართულებით ყველაფერს თავის სახელს ვარქმევთ“, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ სოფო კილაძემ განაცხადა.

მისი თქმით, პრეზიდენტის შეწყალებებთან დაკავშირებით მმართველ გუნდს ყოფილი პრეზიდენტის დროსაც იგივე მიდგომა ჰქონდა.

„მგონია, რომ ამ პროცესს ოპოზიცია ხელოვნურად აჟიტირებს. ყველა ვთანხმდებით იმაზე, რომ მკვლელების შეწყალება ნამდვილად არ იყო სწორი ნაბიჯი. ამას თავად ქალბატონი სალომე ზურაბიშვილიც ამბობს. იყო თუ არა აქ დანაშაულის ნიშნები, ამაზე პროკურატურამ უკვე გამოძიება დაიწყო და მივყვებით. არ მგონია ამ თემების ხელოვნურად აჟიტირება სწორი იყოს. კანონის წინაშე ყველა თანასწორია და აქედან გამომდინარე ყველამ თავის საქმე უნდა აკეთოს“, - განაცხადა სოფო კილაძემ.

კითხვაზე, არსებობს თუ არა სალომე ზურაბიშვილის მიმართ იმპიჩმენტის დაწყების საფუძველი და უნდა დაიბარონ თუ არა პრეზიდენტი გამოკითხვაზე, სოფო კილაძე პასუხობს, რომ ხელშეუხებელი არავინაა.

„ჩვენთვის ხელშეუხებელი პიროვნებები არ არსებობენ. თქვენ თვითონაც ხედავთ, რომ პროკურატურამ პრეზიდენტთან დაკავშირებულ საქმეზე გამოძიება დაიწყო. ამიტომ, ამ საგამოძიებო მოქმედებების პირობებში, რაც საჭირო იქნება, აბსოლუტურად ყველა თანამდებობის პირი, ჩემიდან დაწყებული, ნებისმიერ შემთხვევაში კანონს დაემორჩილება.

შეწყალების საკითხებთან დაკავშირებით, მე მაქვს განცდა, რომ გარკვეული წრეების მხრიდან ნამდვილად ორმაგი სტანდარტებია. ის, რაც მარგველშვილის შემთხვევაში იყო მისაღები, ამ წრეებისთვის ქალბატონი სალომეს შემთხვევაში მისაღები არ არის. „ქართული ოცნებისთვის“ მარგველაშვილის შემთხვევაშიც და ზურაბიშვილის შემთხვევაშიც, ორივე მიმართულებით ყველაფერს თავის სახელს ვარქმევთ. „ქართული ოცნება“ არ ყოფილა რბილი არც ერთი თანამდებობის პირის მიმართ. ობიექტურად თუ შეხედავთ, ამას „ქართულ ოცნებას“ ვერ დაწამებთ“, - განაცხადა სოფო კილაძემ.

პროკურატურამ პრეზიდენტის მიერ შეწყალების საქმეებზე გამოძიება 20 სექტემბერს დაიწყო. ფაქტს უკვე გამოეხმაურა პრეზიდენტის ადმინისტრაცია. 

სალომე ზურაბიშვილს მკვლელობის მუხლით გასამართლებული მსჯავრდებულების შეწყალებასთან დაკავშირებით აკრიტიკებენ. პრესაში გამოითქვა მოსაზრება, თითქოს კონკრეტული მსჯავრდებულების შეწყალებას დიმიტრი გაბუნია ლობირებდა. გაბუნია ყველა ბრალდებას უარყოფს და ამბობს, რომ მას სისხლის სამართლის საქმეებზე საადვოკატო ლიცენზია არ აქვს. 

საუბარია 2014 წელს პოლიციელ თარაშ მუკბანიანის მკვლელობისთვის, 2004 წელს დავით ოთხმეზურის მკვლელობისა და 1994 წელს გიორგი ქოიავას მკვლელობისთვის მსჯავრდებულების შეწყალებაზე. პრეზიდენმა პატიმრების შეწყალებაზე 18 სექტემბერს მორატორიუმი გამოაცხადა. 

სალომე ზურაბიშვილის გაპრეზიდენტების შემდეგ, პრეზიდენტის ადმინისტრაციასთან მოქმედი შეწყალების კომისია რამდენიმე წევრმა დატოვა. მაშინ ადმინისტრაციაში განაცხადეს, რომ კომისიის დაკომპლექტებაზე მუშაობა დაიწყეს, თუმცა ჯერჯერობით კომისია არ მოქმედებს. კრიტიკის ფონზე 6 სექტემბერს სალომე ზუაბიშვილი გამოვიდა ინიციატივით, რომ შეწყალების გამოყენების უფლება დროულად დაიხვეწოს.

2019 წლის მარტში ცნობილი გახდა, რომ შეწყალების კომისია იუსტიციის სამინისტროში გადავა.