შსს კამპანიის „მეტი სიცოცხლისთვის“ მეორე ეტაპს იწყებს

ავტოსაგზაო შემთხვევებისა და შედეგად დაშავებულთა რაოდენობამ იკლო, თუმცა მნიშვნელოვანია საგზაო უსაფრთხოების ღონისძიებები აქტიურად გაგრძელდეს ყველას ჩართულობით, - ამის შესახებ ჟურნალისტებთან საუბარში შინაგან საქმეთა მინისტრის მოადგილემ ნინო ჯავახაძემ საგზაო უსაფრთხოების კამპანიის მეორე ეტაპის შესახებ საუბრისას განაცხადა.

„აპრილში დავიწყეთ საგზაო უსაფრთხოების კამპანია „მეტი სიცოცხლისთვის“, დღეს კი ამ კამპანიის მეორე ეტაპს ვიწყებთ. ეს არის კომპლექსური ღონისძიებების ნაკრები, რომელიც მოიცავს როგორც საკანონმდებლო ცვლილებებს, ისე პრაქტიკულ კონტროლს და, რა თქმა უნდა, ცნობიერების ამაღლებაზე მიმართულ ღონისძიებებს, რაც, ალბათ, ერთ-ერთი უმნიშვნელოვანესი ნაწილია. მომზადებულია ახალი ვიდეორგოლები, რომლებიც მედიასაშუალებებში აქტიურად გაშუქდება, - განაცხადა შინაგან საქმეთა მინისტრის მოადგილემ ნინო ჯავახაძემ.

ჟურნალისტის კითხვაზე, რას გულისხმობს საკანონმდებლო ცვლილებები და ხომ არ იგეგმება გამკაცრება, ნინო ჯავახაძემ განმარტა, რომ საკანონმდებლო ცვლილებები ორ ნაწილად გაიყოფა.

„ერთი ნაწილია მართვის მოწმობის რეალურ პირობებში გატანა, რასთან დაკავშირებითაც საკანონმდებლო ცვლილებები უკვე პარლამენტშია წარდგენილი, მეორე ნაწილი კი არის ცვლილებები ადმინისტრაციულ სამართალდარღვევათა კოდექსში, რომლებიც ჯერ არაა წარდგენილი და გარკვეულწილად სანქციების დიფერენცირებას გულისხმობს. საუბარია საკმაოდ მძიმე სამართალდარღვევებზე, როგორიც არის ნასვამ მდგომარეობაში მანქანის მართვა, შემთხვევის ადგილის მიტოვება, სიჩქარის გადაჭარბება და ა.შ", - განმარტა ჯავახაძემ.

მედია დაინტერესდა, როგორია სტატისტიკა კამპანიის პირველი ეტაპის შემდეგ და არის თუ არა შეცვლილი უკეთესობისკენ მდგომარეობა, რაზეც მინისტრის მოადგილემ განაცხადა, რომ „თუ შევაჯამებთ 2019 წლის 9 თვის მონაცემებს, წინა წლის 9 თვესთან შედარებით კლება გვაქვს“.

„კლების მაჩვენებელი არის როგორც ავტოსაგზაო შემთხვევების რაოდენობაში ისე დაშავებულთა რაოდენობაში, უმნიშვნელო კლებაა ასევე ავტოსაგზაო შემთხვევების შედეგად გარდაცვლილთა რაოდენობაში, თუმცა ჩვენ უნდა გვესმოდეს, რომ ეს ერთჯერადი ეფექტი მოდუნების საშუალებას არ გვაძლევს. მნიშვნელოვანია, რომ ეს ღონისძიებები აქტიურად გაგრძელდეს ყველას ჩართულობით, ვინაიდან საკმაოდ დიდი დრო უნდა ამ ეფექტის მისაღებად, შესაბამისად ეს ღონისძიებები უნდა გაგრძელდეს“, - განაცხადა ჯავახაძემ.