აქციაზე დაკავებულ „ნაცმოძრაობის“ პოლიტსაბჭოს წევრს 2000 ლარიანი ჯარიმა დააკისრეს

თბილისის საქალაქო სასამართლომ „ნაციონალური მოძაობის“ პოლიტიკური საბჭოს წევრს, ბესიკ გაზდელიანს, რომელიც გუშინ ადმინისტრაციული წესით დააკავეს, 2-ათასლარიანი ჯარიმა დააკისრა.

შსს-ს წარმომადგენელმა თქვა, რომ გაზდელიანი არ დაემორჩილა სამართალდამცველის კანონიერ მოთხოვნას და ხელს უშლიდა მოქალაქეების გადაადგილებას, ასევე იქცეოდა აგრესიულად. 

გაზდელიანის ადვოკატი კი ამბობს,რომ პოლიციელის მოწოდება უკანონო იყო. 

ბესიკ გაზდელიანი ადმინისტრაციულ სამართალდარღვევათა კოდექსის 173-ე და 166-ე მუხლებით დააკავეს. პირველი სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას, ხოლო მეორე მუხლი წვრილმან ხულიგნობას გულისხმობს.

25 ნოემბერს ოპოზიციამ საქართველოს პარლამენტთან აქცია გამართა, შემდეგ კი პარლამენტის შესასვლელები დაიკავეს. სპეცრაზმი პარლამენტთან დაახლოებით დილის 05:00 საათზე გამოჩნდა. მათ აქციის მონაწილეებს პარლამენტის შესასვლელები დაატოვებინეს. გამოყენებული იყო წყლის ჭავლიც. 

შსს-ს ინფორმაციით, პარლამენტთან აქციაზე 28 ადამიანი დააკავეს. 

„ქართული ოცნების“ გენერალურმა მდივანმა, თბილისის მერმა კახა კალაძემ 25 ნოებერს თქვა, რომ 2020 წლის არჩევნები შერეული საარჩევნო სისტემით ჩატარდება, ასევე განაცხადა, რომ „ქართული ოცნება“ რიგ საარჩევნო ოლქში მაჟორიტარობის კანდიდატებს არ დააყენებს.

ოპოზიციამ კი განაცხადა, რომ არჩევნების „გერმანული მოდელით“ ჩატარებასთან დაკავშირებით კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.