ბექა ნემსიწვერიძე: მიგვაჩნია, რომ ბრალდება აბსურდული და დაუსაბუთებელია

გიორგი შაქარაშვილის საქმეზე ბრალდებული მორაგბეების ადვოკატი ბექა ნემსიწვერიძე ბრალდებას აბსურდულსა და დაუსაბუთებელს უწოდებს. არჩილ გაგნიძისა და ვასილ მახარაძის ინტერესების დამცველს მიაჩნია, რომ პროკურატურას დღეს ახალი არაფერი გაუჟღერებია და არსებული მტკიცებულებების მიხედვით, სასამართლომ მისი დაცვის ქვეშ მყოფების მიმართ მხოლოდ გამამართლებებლი განაჩენი უნდა გამოიტანოს.

„შეფასების გაკეთებას მას შემდეგ შევძლებთ, რაც ახალი მასალები გადმოგვეცემა და გავეცნობით მას. თუმცა ბრალდების შესახებ დადგენილებაში მტკიცებულებების ნაწილში ჩვენ ახალი ვერაფერი ვნახეთ. ბრალდება ისევ ეყრდნობა იმ მტკიცებულებებს, რაც აქამდე იყო საქმეში. ესენია ამირხანაშვილის, ახვლედიანის, ქათამაძისა და სხვა ჩვენებები. მიგვაჩნია, რომ ბრალდება აბსურდული და დაუსაბუთებელია. ერთადერთი სწორი გადაწყვეტილება ამ მომენტისათვის არსებული მტკიცებებულებებიდან გამომდინარე შეიძლება იყოს მხოლოდ გამამართლებელი განაჩენი“, - განაცხადა ნემსიწვერიძემ.

საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო.

გენპროკურატურამ შაქარაშვილის საქმეზე 11 ბრალდებულის საქმე ცალკე წარმოებად გამოყო. გიორგი შაქარაშვილის საქმეზე ხუთ დაკავებულს ბრალი დაუმძიმდა.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.