ივერი მელაშვილი სასამართლოსთვის გირაოს შეთავაზებას არ აპირებს

დავით გარეჯის საქმეზე დაკავებულის მეუღლე თამარ სულაძე ივერი მელაშვილის მიმართ ბრალდებას შეთითხნილს უწოდებს. თამარ სულაძე აცხადებს, რომ მისი სურვილია, გირაოს მოთხოვნა, თუმცა ამას თავად ბრალდებული არ ეთანხმება.

„დანაშაული არ არსებობს, არის შეთითხნილი დანაშაული იმიტომ, რომ რაღაც პოლიტიკურად ააგორონ, ვითომ იმ ხელისუფლების დროს მოხდა რაღაც დანაშაული - ვითომ, ისინი არიან სისხლის მსმელები, მიწის გამყიდველები, ჩვენ ვართ ფრთიანი ანგელოზები და ხალხის იმ ნაწილმა, რომელიც არ არის ჩახედული საქმეში, შეიძლება იფიქროს: „არიქა, ისინი არ მოვიდნენ, ესენი იყვნენ და ხმებს მოიპოვებენ ამით“, აი, ეს არის, აქ მეტი არაფერია.

ყოველი არჩევნების წინ რაღაც სპექტაკლს დგამენ. მე ადვოკატს ვუთხარი, რომ ბინას ჩავდებ, რომ გირაოთი გამოუშვან. მას რატომღაც ეს არ უნდა. მე მინდა, რომ გირაო მოვითხოვო, მაგრამ თვითონ თუ უარს ამბობს...მე ვურჩევ გირაოს იმიტომ, რომ გარეთ იყოს. რატომ უნდა იყოს დაკავებული, როცა უდანაშაულოა“, - აღნიშნავს თამარ სულაძე.

ადვოკატის ედუარდ მარიკაშვილის განმარტებით, ივერი მელაშვილი თვლის, რომ ეს მისი ბრძოლაა, ბოლომდე იბრძოლებს და არანაირი დათმობა არ იქნება იმის გამო, რომ ის გარეთ იყოს.

ივერი მელაშვილსა და ნატალია ილიჩოვას დავით გარეჯის საქმეზე ბრალი ოფიციალურად დღეს წარედგინათ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.