დავით გარეჯის საქმის პროკურორი: დაკავებულთა ადვოკატებს საქმეში არსებული მტკიცებულებები ამ დრომდე არ მოუთხოვიათ

დღეს ოპოზიციური პარტიების ნაწილმა საგარეო საქმეთა სამინისტროსთან საპროტესტო აქცია გამართა. ისინი ივერი მელაშვილისა და ნატალია ილიჩოვას გათავისუფლებას ითხოვდნენ და განაცხადეს, რომ დაკავებულების ადვოკატებს საგარეო საქმეთა სამინისტრომ უნდა გადასცეს დოკუმენტაცია, რითაც შეკრებილების თქმით, მათი უდანაშაულობა დასტურდება.

დავით გარეჯის საქმის პროკურორი მიხეილ სადრაძე „ქრონიკასთან“ საუბარში აცხადებს, რომ დაკავებულების ადვოკატებს საქმეში არსებული მტკიცებულებები ამ დრომდე არ მოუთხოვიათ. პროკურორი ასევე არ გამორიცხავს, რომ დავით გარეჯის საქმეზე დამნაშავეთა წრე კიდევ გაიზარდოს.

„ჩვენ დავკითხეთ მოწმე ნინო კალანდაძე და მის დაკითხვას არ დაესწრნენ ივერი მელაშვილის ადვოკატები. ლეგიტიმური იქნებოდა, რომ მოწმესთან კითხვები დაცვის მხარესაც ჰქონოდა, თუმცა ისინი საერთოდ არ გამოცხადდნენ. უფრო მეტიც, ივერი მელაშვილის ადვოკატებმა ბრალის წარდგენის შემდეგ დღემდე მტკიცებულებები არც კი მოითხოვეს. ჩვენ ძალიან ბევრი მტკიცებულება მოვიპოვეთ და მათ აქვთ უფლება, ნებისმიერ დროს, თუნდაც ყოველდღე მოითხოვონ ახალი მტკიცებულებები, რასაც პროკურატურა მოიპოვებს, თუმცა 8 ოქტომბრის შემდეგ მათ საერთოდ მტკიცებულებები არ მოუთხოვიათ. პარალელურად ისინი საქმის პოლიტიზებას ცდილობენ და ამბობენ, რომ თითქოსდა ამ საქმეში არ არსებობს მტკიცებულებები. თუმცა დაცვის პოზიცია სამართლებრივი შემადგენელისგან აბსოლუტურად თავისუფალია. მტკიცებულებებს ისინი საერთოდ არ ითხოვენ, შესაბამისად, მე ვთვლი, რომ მათ პოზიციაში საღი აზრი ნაკლები არის. კომპიუტერებიდან ინფორმაციის აღდგენის კონტექსტში მნიშვნელოვანი ინფორმაციის მოლოდინი გვაქვს. ეს იქნება ელექტრონული რუკები, რომლებსაც ისინი შეგნებულად არ იყენებდნენ. მაღალი ალბათობით, ექსპერტიზის შედეგად დადასტურდება, რომ ამ ადამიანებს საქმეში ნახსენები რუკები არა მხოლოდ მატერიალური სახით, არამედ ელექტრონული სახითაც ჰქონდათ“, - აცხადებს მიხეილ სადრაძე.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.