სასამართლოში იაკობ ბრეგვაძის დაკითხვა მიმდინარეობს

სასამართლოში იაკობ ბრეგვაძის დაკითხვა მოწმის სახით მიმდინარეობს. შენობაში შესვლამდე მან ჟურნალისტებს განუცხადა, რომ მას ჩვენება არ შეუცვლია.

დაასახელა თუ არა მან კონკრეტული პირები, რომლებიც ბრალდებულები არიან, ე.წ. ოქროს მოწმის, დაზარალებულის სტატუსის მქონემ უპასუხა: „არა, ვისაც არ ვიცნობ, მას როგორ დავასახელებ“.

ადვოკატ, ირმა ჭკადუას განცხადებით, იაკობ ბრეგვაძეს ჩვენებები არ შეუცვლია.

ჭკადუა განმარტავს, რომ მან გამოძიების ეტაპზე გარკვეული დეტალები დააზუსტა და ის დღესაც მზად არის, ყველა კითხვას პასუხი გასცეს.

„ჩვენების შეცვლას ადგილი არ ჰქონია, ძალიან კარგადაა ცნობილი თოთოეული მისი ჩვენება, ის გამოძიებაში ორჯერ არის დაკითხული, მეორე დაკითხვისას უბრალოდ გარკვეული დეტალები დააზუსტა. ის უპასუხებს ყველა კითხვას, რაც დასმული იქნება, იაკობი უკვე ამ სასამართლო პროცესზე პროკურორების მიერ დაკითხულია, მხოლოდ დარჩენილია დაცვის კითხვები. მან ყველა კითხვას გასცა პასუხი და დღესაც მზად არის, გასცეს პასუხები“, - განაცხადა ჭკადუამ.

მან ასევე განმარტა, რატომ იმყოფებოდა იაკობ ბრეგვაძე გუშინ საღამოს პროკურატურაში.

„რაც შეეხება გუშინდელ ამბავს, თუ რატომ არ ვიყავი მასთან ერთად პროკურატურაში, ის არ იკითხებოდა, მას ფოტოაპარატის განათება სჭირდებოდა, რადგან ეს მისი პროფესიული საქმიანობისთვის ძალიან მნიშვნელოვანია. მიუხედავად იმისა, რომ მას ავუხსენი, ვიდრე სასამართლო არ დასრულდებოდა, არ დაუბრუნებდნენ, მან მაინც სთხოვა უწყებას და მათგან უარი მიიღო“, - განაცხადა ირმა ჭკადუამ.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.