სასამართლომ პროკურორის აცილების შესახებ მიხეილ სააკაშვილის ადვოკატების შუამდგომლობა არ დააკმაყოფილა

თბილისის საქალაქო სასამართლოში, სადაც ამ წუთებში სახელმწიფოს კუთვნილი 9 მილიონის გაფლანგვის საქმე განიხილება, დაცვის მხარემ სხდომაზე რამდენიმე შუამდგომლობა დააყენა. მათ შორის იყო შუამდგომლობა პროკურორ გიორგი მუჯირის აცილების შესახებ. ნიკა გვარამიას მტკიცებით, მუჯირმა პოლიტიკური განცხადება გააკეთა და მის პოლიტიკურ მიუკერძოებლობაზე აქვს პრეტენზია.

ამ შუამდგომლობის დაყენებას პროკურორებსა და გვარამიას შორის შელაპარაკება მოჰყვა. პროკურორის თქმით, თანხების გაფლანგვის შესახებ „იმედთან“ საუბრისას ფაქტებს ეყრდნობოდა და მიკერძოებაზე საუბარი ზედმეტია.

მოსამართლე ბადრი კოჭლამაზიშვილმა აღნიშნული შუამდგომლობა არ დააკმაყოფილა. მან, საზოგადოებისთვის, საკუთარი გადაწყვეტილება დეტალურად განმარტა.

„საზოგადოებამ უნდა იცოდეს, რა არის მიკერძოება, რა არის პოლიტიკური მიკერძოება და ბრალდების მხარის სიტყვები ჯდება თუ არა პოლიტიკური მიკერძოების ფარგლებში. მიკერძოება არის გადახრა პირის სასარგებლოდ ან საზიანოდ, რაც, სამართალში, ორივე შემთხვევაში, დაუშვებელია. რაც შეეხება პოლიტიკურ მიკერძოებას - ეს გახლავთ შემთხვევა, როდესაც პროკურორი სისხლის სამართლებრივ დევნასა და ბრალდებას აფუძნებს არა მხოლოდ სამართლებრივ არგუმენტებზე, არამედ, უპირატესად - პოლიტიკურ მოტივაციაზე, პოლიტიკურ ნიშანსა და პოლიტიკურ საფუძველსა და სარჩულზე. შესაძლებელია, რომ სამართლებრივი დევნა, ერთი მხრივ, წარიმართოს საერთოდ პოლიტიკური ნიშნით, რაც, კლასიკური გაგებით, პოლიტიკური დევნაა, ამავდროულად, შესაძლოა, არსებობდეს პოლიტიკური საფუძველიც, თუმცა, პროცესში, პროკურორმა, გამოიჩინოს იმგვარი მიკერძოებულობა, როგორიც, პოლიტიკური ნიშნით, არათანაბარზომიერ მდგომარეობაში ჩააყენებს დევნის ადრესატს.დაცვის მხარემ პროცესზე რამდენიმეწუთიანი ჩანაწერი მოგვასმენინა, სადაც პროკურორი საუბრობს საქმესთან დაკავშირებით და ახსენებს ორ თარიღს. როგორც გავიგე, ეს თარიღებია 26 მაისი და, თუ არ ვცდები, 13 ივნისი. დაცვის მხარეს აქვს პრეტენზია, რომ, ამ საქმის ფარგლებში, ამ ორი თარიღის მოხსენიებას სხვა დანიშნულება არ ჰქონდა. ერთი თარიღი პოლიტიკურ აქტივობას უკავშირდება, მეორე - წმინდად, ადამიანურად ტრაგიკული თარიღია. როდესაც პროკურორი სისხლის სამართლებრივ დევნას ახორციელებს და მხარს უჭერს სახელმწიფო ბრალდებას, ეს მხოლოდ ქმედების სამართლებრივ შეფასებას კი არ ნიშნავს, არამედ, მათ შორის, ბრალდების კომპონენტი მოიცავს, მათ შორის, განკიცხვის კომპონენტს, რომელიც, თავის მხრივ, მორალურ კატეგორიას მოიცავს. რა თარიღებიც იყო მოხსენიებული, რომლებიც უკავშირდებოდა იმას, რომ, ამ თარიღების შემდეგ, იმდროინდელ პრეზიდენტს შეეძლო თუ არა, საზღვარგარეთ, ასეთი მომსახურება მიეღო, ეს, შესაძლოა, გარკვეულწილად, სცილდებოდეს სამართლებრივ ფარგლებს, იმ თვალსაზრისით, რომ, თითქოს, საქმის ფაქტობრივ გარემოებებს აღარ ეხება, თუმცა, მხოლოდ და მხოლოდ მორალურ სფეროში გადადის და ამით ხაზი გაესვა იმას, რომ ამ თარიღების შემდეგ, პრეზიდენტს უნდა მიეცა თუ არა ასეთი მომსახურების მიღების უფლება საკუთარი თავისთვის. ეს მხოლოდ მორალურ სფეროში გადასული საკითხია და პოლიტიკური მიკერძოება ნამდვილად არ ვლინდება. ამ შემთხვევაში, დაცულია პოლიტიკური ნეიტრალიტეტი“, - აღნიშნა მოსამართლემ.

იქამდე, დაცვის მხარემ სხდომაზე დააყენა შუამდგომლობა სხდომაზე მედიის დასწრების შესახებ, რომელიც მოსამართლემ დააკმაყოფილა. მოსამართლის გადაწყვეტილებით, პროცესი ეთერებში 2 წუთის დაგვიანებით გადაიცემა.

თბილისის საქალაქო სასამართლო ამ წუთებში სახელმწიფოს კუთვნილი 9 მილიონის გაფლანგვის საქმეს განიხილავს. საქმეზე ექსპრეზიდენტი მიხეილ სააკაშვილი და სახელმწიფო დაცვის სპეციალური სამსახურის ყოფილი ხელმძღვანელი, თემურ ჯანაშია არიან ბრალდებულები. სხდომას თავად მიხეილ სააკაშვილიც ესწრება.

საქართველოს ყოფილი პრეზიდენტი 1-ელ ოქტომბერს დააკავეს.

მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.