საკონსტიტუციოს გადაწყვეტილებას რუსთავი 2-ის ადვოკატი აფასებს

ტელეკომპანია "რუსთავი 2"-ის იურისტის - დიმიტრი საძაგლიშვილის განცხადებით, სამოქალაქო საპროცესო კოდექსის ის ნორმა, რომელსაც თამაზ ურთმელიძის გადაწყვეტილება დაეფუძნა, ბუნდოვანი და გაუგებარია. საძაგლიშვილი მიიჩნევს, რომ ეს ნორმა საკონსტიტუციო სასამართლოს ანტიკონსტიტუციურად უნდა ეცნო.

"საერთაშორისო გამჭვირვალობა საქართველოს" იურისტის - გია გვილავას განცხადებით, ნორმა უზენაესმა სასამართლომ განმარტა და თქვა, რომ შეუსაბამო ფასის გამო ხელშეკრულება არ უნდა გაუქმდეს. შესაბამისად, უზენაესის გადაწყვეტილების შემდეგ, მოსამართლეებს ამ ნორმის სხვაგვარად განმარტება აღარ შეუძლიათ და საკონსტიტუციო სასამართლომაც არ გააუქმა, რადგან ნორმა უზენაესის მიერ უკვე განმარტებულია და მოსამართლეებს უფლება არ აქვთ ურთმელიძის მსგავსად გამოიყენონ სხვა განმარტება.

ურთმელიძემ ამორალურ გარიგებად მიიჩნია ქიბარ ხალვაშისათვის გადახდილი 260 000, როდესაც ექსპერტიზით ტელეკომპანია "რუსთავი 2"-ის ღირებულება 6 მილიონი იყო. 

დღეს "რუსთავი ორი პარლამენტის წინააღმდეგ"- საკონსტიტუციო სასამართლომ სარჩელი არ დააკმაყოფილა. ამ გადაწყვეტილებას სამი განსხვავებული აზრი დაერთო: გიორგი კვერენჩხილაძის, ირინა იმერლიშვილისა და მაია კოპალეიშვილს.

"რუსთავი 2"-ის საკონტროლო პაკეტის მფლობელი შპს საქართველო სამოქალაქო კოდექსის იმ მუხლის არაკონსტიტუციურად ცნობას ითხოვდა, რომელიც ფასის არაპროპორციულობის გამო, ხელშეკრულების ბათილობის შესაძლებლობას ქმნის. 

9 დეკემბერს იუსტიციის მინისტრმა თეა წულუკიანმა განაცხადა, რომ სტრასბურგმა "რუსთავი 2"-ის საქმის დასაშვებობის განხილვა დაიწყო.

უწყების ინფორმაციით, „ადამიანის უფლებათა ევროპულმა სასამართლომ საქმის „შპს „სამაუწყებლო კომპანია რუსთავი 2“ და სხვები საქართველოს წინააღმდეგ“ დასაშვებობის განხილვა 2017 წლის 28 ნოემბერს დაიწყო. საქმეში ოთხი მომჩივანია: შპს „სამაუწყებლო კომპანია რუსთავი 2“, შპს „ტელეკომპანია საქართველო“; ლევან ყარამანიშვილი და გიორგი ყარამანიშვილი.

სტრასბურგის სასამართლო თავის წერილში საქართველოს მთავრობას კითხვებს უსვამს თითოეულ მომჩივანთან მიმართებით.

„საქართველოს მთავრობამ მოცემულ კითხვებს 2018 წლის 29 მარტისთვის უნდა უპასუხოს. მთავრობის პასუხები და არგუმენტები მომჩივნებს გადაეგზავნებათ და, სასამართლოს რეგლამენტის 28-ე მუხლის შესაბამისად, კონტრარგუმენტების წარსადგენად სექციის თავმჯდომარის მიერ რამდენიმეკვირიანი ვადა განესაზღვრებათ. ამის შემდეგ ევროპული სასამართლო იმსჯელებს საჩივრის დასაშვებობაზე თითოეული მომჩივნის ნაწილში და გადაწყვეტს, რომელ გარემოებებსა და რომელ კონკრეტულ მომჩივანთან უნდა გააგრძელოს საქმის არსებითი განხილვა”, - ნათქვამია იუსტიციის სამინისტროს მიერ გავრცელებულ ინფორმაციაში.

2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2" ქიბარ ხალვაშს მიაკუთვნა. 3 მარტს, „რუსთავი 2"-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება 8 მარტამდე 8 მარტამდე შეაჩერა, 7 მარტს კი - განუსაზღვრელი ვადით შეაჩერა.

ტელეკომპანია "რუსთავი 2"-ზე სამართლებრივი დავა მეორე წელია მიმდინარეობს. "რუსთავი 2"-ის სამართლებრივი გზით დაბრუნებას ბიზნესმენი ქიბარ ხალვაში და არხის დამფუძნებლები ჯარჯი აქიმიძე და დავით დვალი ცდილობენ. ისინი აცხადებენ, რომ მათ ტელეკომპანია ნაციონალების ხელისუფლებამ ძალით დაათმობინა. სამართლებრივი დავა აქტიურ ფაზაში "ქართული ოცნების" ხელისუფლებაში მოსვლის შემდეგ შევიდა.