ექსპერტი: ტატუნაშვილს სხეულზე მრავლობითი დაზიანებები აღენიშნება

წამების მსხვერპლთა რეაბილიტაციის ცენტრი “ემპათია“ არჩილ ტატუნაშვილის ცხედარზე ჩატარებული ექსპერტიზის პირველად მონაცემებს სპეციალური განცხადებით ავრცელებს, რომელსაც ორგანიზაცია თავის ვებგვერდზე აქვეყნებს.

“2018 წლის 20 -21 მარტს  ლ. სამხარაულის სახელობის სასამართლო ექსპერტიზის ეროვნული ბიუროს სასამართლო – სამედიცინო ექსპერტიზის დეპარტამენტში ჩატარებულ იქნა სასამართლო – სამედიცინო ექსპერტიზა, რომელშიც მონაწილეობდა წამების მსხვერპლთა რეაბილიტაციის ცენტრის სასამართლო სამედიცინო ექსპერტი ბატონი ირაკლი თოიძე, პროკურატურის დადგენილების შესაბამისად.

წინასწარი მონაცემებით, არჩილ ტატუნაშვილს სხეულზე აღენიშნება მრავლობითი დაზიანებები, რაც დიდი ალბათობით მიუთითებს წამების კვალზე.

ცენტრი „ემპათია“ -ს ექსპერტები მიიჩნევენ, რომ აუცილებელია ჩატარდეს კომპლექსურ – კომისიური ექსპერტიზა საერთაშორისო სტანდარტების შესაბამისად, კერძოდ, მინესოტას პროტოკოლი, სტამბოლის პროტოკოლი, რათა დადგენილ იქნას წამების სავარაუდო ფაქტსა და გარდაცვალების მიზეზს შორის მიზეზ – შედეგობრივი კავშირი“, - ნათქვამია ორგანიზაციის განცხადებაში.

 ტატუნაშვილის შესაძლო წამების შესახებ განცხადება დღეს დევნილთა მინისტრმა, სოზარ სუბარმაც გააკეთა. მანამდეც, ქართული მხარე, ცხედრის გადმოცემის გაჭიანურებას, სწორედ წამებაზე ვარაუდითღ ხსნიდა.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა. 

ტატუნაშვილის ცხედარი ქართული მხარის მიერ კონტროლირებად ტერიტორიაზე 20 მარტს  გადმოასვენეს.  ოკუპირებული რეჟიმის მსხვერპლ არჩილ ტატუნაშვილს შაბათს ქანდის სასაფლაოზე დაკრძალავენ.