სპეცოპერაციის შედეგად გუშინ დაკავებული გივი ბეგიაშვილი ბრალს არ აღირებს

კრიმინალური სამყაროს წევრობისა და თანხის გამოძალვის მცდელობისათვის დაკავებული გივი ბეგიაშვილი ბრალს არ აღიარებს - ამის შესახებ დაკავებულის ადვოკატმა “ქრონიკას” განუცხადა.

„გივი ბეგიაშვილი არ აღიარებს იმ ბრალს, რაც დაკავებისას წარედგინა. ოფიციალურად ბრალის დადგენილება ჯერ არ ჩაგვბარებია. მას ქურდულ სამყაროსთან იმგვარი კავშირი არ გააჩნია, რაზეც გამოძიება საუბრობს", - თქვა ზურაბ ბეგიაშვილმა.

კითხვაზე, რა კავშირი შეიძლება ჰქონდა დაკავებულს ქურდულ სამყაროსთან, ადვოკატმა განაცხადა, რომ ამის შესახებ მისთვის ცნობილი არ არის. სპეცოპერაციების შედეგად დაკავებულ სამ პირს ბრალს დღის ბოლომდე წარუდგენენ. აღკვეთის ღონისძიების შესახებ სასამართლო პროცესი კი თბილისის საქალაქო სასამართლოში ხვალ გაიმართება. 

მიმდინარე წლის 19 აპრილს თბილისსა და კახეთში ერთდროულად, კრიმინალური სამყაროს 3 წევრი დააკავეს, რომლებსაც აქტიური კავშირი ჰქონდათ ევროპაში მყოფ ქართველ ე.წ. კანონიერ ქურდებთან, მათგან დავალებებს იღებდნენ და „ქურდული სამყაროს“ მიერ დადგენილი წესებით მოქმედებდნენ. 

გამოძიება საქართველოს სისხლის სამართლის კოდექსის 223-ე პრიმა მუხლით მიმდინარეობს, რაც ქურდული სამყაროს წევრობას გულისხმობს. 

18 აპრილს პარლამენტმა „ქურდულ სამყაროსთან“ დაკავშირებული ცვლილებები დაამტკიცა.