მწყემსის ადვოკატი: მალხაზ კობაურს ორი უცხო პირი უნდა ეთქვა და არა - ორი უცხოელი

​ხადას ხეობაში მკვლელობის ბრალდებით დაკავებული მალხაზ კობაურის ადვოკატი აცხადებს, რომ ბრალდებულმა დღევანდელ სასამართლო პროცესზე არასწორად წარმოთქვა სიტყვა. ამის შესახებ 1tv წერს.

მისი თქმით, მალხაზ კობაურს ორი უცხო პირი უნდა ეთქვა და არა - უცხოელი. 

სასამართლო სხდომაზე, სადაც ბრალდბულისთვის აღკვეთის ღონისძიების შეფარდებაზე მსჯელობდნენ, მალხაზ კობაურმა განაცხადა, რომ „ორი უცხოელი პიროვნება“ დაემუქრა. არსებობს ბრალდებულის სიტყვის ამსახველი აუდიო-ვიდეომასალა.

ბრალდებულმა სასამართლოში თქვა, რომ სმითების ოჯახი მას არ მოუკლავს, არამედ ორმა უცხოელმა კაცმა მოკლა, რომლებიც მალხაზ კობაურს დედამიშვილების მოკვლით დაემუქრნენ. 

სასამართლომ ამერიკელი ცოლ-ქმრისა და მათი 4 წლის შვილის მკვლელობაში ბრალდებულ მწყემს, მალხაზ კობაურის აღკვეთის ღონისძიებად წინასწარი პატიმრობა შეუფარდა. ბრალის დამტკიცების შემთხვევაში მალხაზ კობაურს სამუდამო პატიმრობა ემუქრება. 

პროკურორის ინფორმაციით, სმიტების ოჯახის წევრების მკვლელობაში ბრალდებულმა მალხაზ კობაურმა სამართალდამცველებს მცირეწლოვანი ბავშვის ცხედარი თავად აპოვნინა. 

"მალხაზ კობაურმა ისეთ დეტალებზე ილაპარაკა გამოძიებასთან, რომელიც შეუძლებელია იცოდეს პირმა, თუ ის ადგილზე არ იმყოფებოდა და უშულოდ არ ჩადიოდა დანაშაულს. კერძოდ, თუ როგორ მოკლა კაცი, რომელსაც ჯერ ზურგში ესროლა და შემდეგ თავში, შემდგომ როგორ ესროლა ბავშვს, როგორ გამოეკიდა დედას და ა.შ. ეს ყველა დეტალი შეუძლებელია იცოდეს იმ ადამინმა, ვინც უშუალოდ არ იმყოფებოდა შემთხვევის ადგილზე და ვინც არ ახორციელებდა ყოველივე ზემოაღნიშნულს, მითუმეტეს, რომ მას გააჩნდა ამის საშუალება, ჰქონდა თოფი და იმყოფებოდა ნასვამ მდგომარეობაში“, - აღნიშნა პროკურორმა.

ხადის ხეობაში ამერიკელების მკვლელობის გამოძიებაში FBI ერთვება.

7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმიტი და მისი მეუღლე ლორა - დაღუპული იპოვეს.  მოგვიანებით იპოვეს მათი 4 წლის ბავშვის ცხედარიც.

მათ ორმაგი მოქალაქის სტატუსი ჰქონდათ მინიჭებული და რამდენიმე წელია, რაც საქართველოში ცხოვრობდნენ.