ვიცეპრემიერი და ანაკლიის კონსორციუმის დირექტორი პარლამენტში დაბარებაზე დეპუტატებს პასუხობენ

„პოლიტიკური სანახაობა არც მთავრობას და არც ანაკლიიის განვითარების კონსორციუმს სჭირდება. მხარეები მზად არიან საქმიანი შეხვედრისთვის“, - ასე უპასუხეს ინფრასტრუქტურის მინისტრმა მაია ცქიტიშვილმა და „ანაკლიის განვითარების კონსორციუმის“ გენერალურმა დირექტორმა ლევან ახვლედიანმა დეპუტატებს, რომლებიც მათ პარლამენტში, ღია ფორმატის შეხვედრაზე იბარებენ. 

„ანაკლიის განვითარების პროექტს არ სჭირდება კიდევ ერთი პერფორმანსი და პარლამენტში ღია განხილვის მოწყობა. ჩვენ ამ შეხვედრებს აუცილებლად გამართავთ იმ სამუშაო ფორმატში და არა პარლამენტში, რომელიც ორივე მხარეს საშუალებას მოგვცემს ამ პროექტის წარმატებისთვის აუცილებელი გამოსავალი მოვძებნოთ“, - განაცხადა მაია ცქიტიშვილმა.

„პოლიტიკური შოუს მოწყობა ჩვენს ინტერესებშიც არ შედის.. ჩვენ თუ მივალთ [პარლამენტში] ჩვენ გვინდა რომ ეს იყოს საქმიან გარემოში და საქმიან ვითარებაში მივაწოდოთ ის მნიშვნელოვანია ინფორმაცია“, - განაცხადა ლევან ახვლედიანმა. 

პორტის მნიშვნელობაზე, პრობლემებსა და გამოწვევებზე სასაუბროდ დამოუკიდებელმა დეპუტატებმა მხარეები პარლამენტში მიიწვიეს. დეპუტატების აზრით, „ანაკლიის ღრმაწყლოვანი პორტის“პროექტის საკითხის სიმწვავიდან გამომდინარე, აღნიშნული შეხვედრა საშუალებას მისცემს ყველა მხარეს ღიად ისაუბროს ანაკლიის პორტის თემაზე, რათა საზოგადოებამ ამომწურავი პასუხები მიიღოს და ორივე მხარის პოზიცია გაიგოს.

ყოფილი თანაგუნდელების პათოსს მმართველ გუნდში არ იზიარებენ და განმარტავენ, რომ ასეთი ფორმატის შეხვედრის აუცილებლობა წლის ბოლოს იქნება.

21 ოქტომბერს „ანაკლიის კონსორციუმის“ 4%-ის მფლობელი ჰოლანდიური Van Oord-ი გახდა. 

16 ოქტომბერს ცნობილი გახდა, რომ ინფრასტრუქტურის სამინისტრომ „ანაკლიის კონსორციუმს“ ხელშეკრულება არ შეუწყვიტა. 

15 ოქტომბერს „ანაკლიის განვითარების კონსორციუმის” გენერალურმა დირექტორმა, ლევან ახვლედიანმა და კონსორციუმის ორმა უცხოელმა წევრმა ბრიფინგი გამართეს. 

ანაკლიის ღრმაწყლოვანი პორტის მშენებლობა 2017 წლის დეკემბერში დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

26 ივლისს ცნობილი გახდა, რომ საქართველოს გენერალური პროკურატურის მიერ „თიბისი ბანკის საქმეზე“  დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილება მიიღეს.

ასევე, ცოტა ხნის წინ, ანაკლიის პროექტი მსხვილმა ამერიკულმა ინვესტორმა - „კონტი ჯგუფმა“ დატოვა. ამ ეტაპზე, კონსორციუმი, ინვესტორებთან დაკავშირებით, მთავრობასთან მოლაპარაკებას მართავს.

რას აპირებდა მთავრობა, თუკი „ანაკლიის კონსორციუმი“ ვერ შეასრულებდა ვალდებულებებს - ამ თემაზე ვრცლად შეგიძლიათ წაიკითხოთ რეგიონული განვითარებისა და ინფრასტრუქტურის მინისტრის მაია ცქიტიშვილის ინტერვიუ.