თემირლან მაჩალიკაშვილის ოჯახი გამოძიებისგან მტკიცებულებების გასაჯაროებას მოითხოვს

პანკისის ხეობაში სპეცოპერაციის შედეგად გარდაცვლილი თემირლან მაჩალიკაშვილის ოჯახი მათ შვილსა და ტერორისტებს შორის კავშირს უარყოფს და გამოძიებისგან მტკიცებულებების გასაჯაროებას მოითხოვს.

ოჯახის ადვოკატი მარიამ კუბლაშვილი ითხოვს, რომ პროკურატურამ თემირლანისა და ახმედ ჩატაევის ან სხვა ტერორისტების კავშირი გამოაქვეყნოს.

,,თემირლან მაჩალიკაშვილის გაიგივება ტერორიზმთან არის ტყვიის გასროლის ტოლფასი. პროკურატურის მიერ გაჟღერებული ინფორმაცია, გავრცელებული პროკურატურის მიერ არის მიუღებელი, რამაც ზიანი მიაყენა მაჩალიკაშვილების ოჯახს. დღეიდან ვარ ამ ოჯახის დამოუკიდებელი ადვოკატი. მე მჯერა მტკიცებულებებისა და ფაქტების. ბრიფინგზე მოვისმინეთ, რომ შეწყდა გამოძიება. ეს ჩვენთვის ახალი არაფერი არ ყოფილა, იქ სადაც არ არსებობს პოლიტიკური ნება. ეს იყო ხელოვნურად გაჭიანურებული ერთწლიანი ვადა. მიმდინარე ორიწლის განმავლობაში ვითხოვდით მტკიცებულებების გაცნობას და ვითხოვდით სპეცრაზმელის ჩვენებას, რის შემდეგაც უნდა ჩატარებულიყო საგამოძიებო ექსპერიმენტი.

თემირლანი სროლის დროს იყო მწოლიარე მდგომარეობაში, უნდა გვემსჯელა შეძლებდა თუ არა ის სპეცრაზმელებისთვის წინააღმდეგობის გაწევას. ამ ნიუანსებს დავადგენდით ჩვენ ექსპერიმენტით. გარდა ამისა გვინდოდა დაგვედგინა რამ მანძილიდან მოხდა გასროლა, რაც ვერ დადგინდა, რადგან დაიკარგა მასრა. ასევე ვერ მოხდა ჭრილობის შესწავლა. რადგან კვალი ხელოვნურად წაიშალა. ტყვიის ბოლო გაჩერების ადგილიც განადგურდა, რაც იმას ნიშნავს, რომ მოხდა მტკიცებულებების ფალსიფიცირება. თუმცა სპეცრაზმელის ჩვენებიდან დგინდება, რომ მან გასროლამდე გადადგა ორი ნაბიჯი, ეს კი იმას ნიშნავს, რომ სპეცრაზმელი იყო თემირლანის საწოლთან. არაერთი ქმედებით მიმდინარეობდა გამოძიების გაჭიანურება. სპეცრაზმელის ჩვენებიდან ჩვენ გვინდოდა საგამოძიებო ექსპერიმემტის ჩატარება , თუმცა გამოძიება შეწყდა, რაც ალოგიკურია. მკვლელობის ადგილზე 3 საათი რჩებოდნენ სპეცრაზმელები, რა დროსაც განახორციელეს ხელყუმბარის სცენარი" - აცხადებს მარიამ კუბლაშვილი.

თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება 28 ნოემბერს შეწყვიტა.

დღეს თემიტრლან მაჩალიკაშვილის მამამ, მალხაზ მაჩალიკაშვილმა პარლამენტში დროებითი საგამოძიებო კომისიის შექმნას ითხოვა, რაზეც მოგვიანებით პარლამენტის თავჯდომარემ განაცხადა, რომ პარლამენტი ამ საკითხს არ განიხილავს.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად.