ბორდმა საზოგადოებრივ მაუწყებელს რატიანის საქმეზე ეთიკური დარღვევები ვერ უპოვა

საზოგადოებრივი მაუწყებლის სამეურვეო საბჭომ ზვიად რატიანის დაკავებისას შსს-ს ვიდეოს გავრცელების გამო, პირველ არხს არც ჯეროვანი სიზუსტის დარღვევა, არც სიძულვილის გაღვივება და არც პირადი ცხოვრების ხელშეუხებლობის დარღვევა დაუდგინა. ინფორმაციას "ნეტგაზეთი" ავრცელებს.

ზვიად რატიანის ვიდეოს გამოქვეყნებისთვის საზოგადოებრივი მაუწყებლის მიერ ამ სამი დარღვევის დადგენას სამეურვეო საბჭოს მხოლოდ ორმა წევრმა, ქეთი მსხილაძემ და ირინა ფუტკარაძემ მისცა ხმა.

5 თებერვალს საზოგადოებრივი მაუწყებლის თვითრეგულირების საბჭომ მიიჩნია, რომ ზვიად რატიანის სადავო ჩანაწერის გავრცელებით პირველ არხს არ დაურღვევია ეთიკური ნორმები, თუმცა დააკმაყოფილა ზვიად რატიანის მხარის ორი მოთხოვნა, რომელიც შეეხებოდა ყველა პლატფორმიდან ვიდეოს წაშლასა და სამომავლოდ არგამოყენებას.

მოგვიანებით, საზოგადოებრივმა მაუწყებელმა შსს-ს ვიდეო საკუთარი პლატფორმიდან წაშალა.

რაც შეეხება პირადი ცხოვრების ხელშეუხებლობს დარღვევას, მარინა მუსხელიშვილი მიიჩნევს, რომ ზვიად რატიანის პირადი ცხოვრება დაარღვიეს შინაგან საქმეთა სამინისტრომ, რომელმაც ეს ვიდეო გაასაჯაროვა და სასამართლომ, რომელმაც სხდომა არ დახურა. მუსხელიშვილს პრეტენზია აქვს რატიანის ადვოკატთანაც და ამბობს, რომ მას უნდა მოეთხოვა პროცესის მედიისთვის დახურვა.

ქეთი მსხილაძე და ირინა ფუტკარაძე კი მიიჩნევენ, რომ საზოგადოებრიცი მაუწყებლი თვითონ უნდა იცავდეს ეთიკის ნორმებს და იყოს მაგალითი.

ზვიად რატიანის ადვოკატის, მარიამ გოგოსაშვილის თქმით, გადაწყვეტილება არალოგიკურია იმ თვალსაზრისით, რომ აღნიშნული საკითხები ერთმანეთთან მოდის წინააღმდეგობაში. გოგოსაშვილმა ზვიად რატიანის საქმეზე საზმაუს თვითრეგულირების საბჭოს გადაწყვეტილება სააპელაციოში, ანუ ამავე მაუწყებლის სამეურვეო საბჭოში გაასაჩივრა, რომელიც დღეს თვითრეგულირების საბჭოს მიერ მიღებულ გადაწყვეტილებას დაეთანხმა.

საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები, რომელზეც არაფხიზელ მდგომარეობაში მყოფი ზვიად რატიანია ასახული. 

საზოგადოებრივი მაუწყებლის წინააღმდეგ ქარტიაში განცხადება მწერლებმა და გამომცემლებმა შეიტანეს.

საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივმა მაუწყებელმა ქარტიის პირველი და მეათე პრინციპები დაარღვიეს.

ზვიად რატიანი საპოლიციო კონტროლის ფარგლებში დააკავეს. სასამართლომ ზვიად რატიანს 2 000-ლარიანი ჯარიმა დააკისრა. პროკურატურამ ზვიად რატიანის მიერ სამართალდამცველების მისამართით წაყენებულ ბრალდებაზე გამოძიება დაიწყო. საქმის მოკვლევა დაიწყო გენინსპექციამაც. რატიანის მიმართ პოლიციელთა უფლებამოსილების შესაძლო გადამეტებაზე გამოძიება პროკურატურამაც დაიწყო.