ბიძინა ივანიშვილი: კვირიკაშვილი არღვევდა ბალანსს ბიზნესის და სახელმწიფოს ინტერესებს შორის, მას აღარ შეეძლო მართვა

მმართველი პარტია „ქართული ოცნება - დემოკრატიული საქართველოს“ თავმჯდომარე ბიძინა ივანიშვილმა საზოგადოებრივ მაუწყებელს ინტერვიუ მისცა. გადაცემა შეკვეთილში, ყოფილი პრემიერმინისტრის სახლშია ჩაწერილი და პირველი არხის ეთერში სრულად 21:45 საათზე გავა.

არხის მიერ გავრცელებულ გადაცემის ანონსში ბიძინა ივანიშვილი გიორგი კვირიკაშვილის თანამდებობიდან წასვლის მიზეზებზე ლაპარაკობს. „ძალიან დიდი იყო ხიფათი გუნდის დაშლის. და პროცესი იყო დაწყებული... ძალიან მძიმედ ვიყავი რამდენიმე დღე, როდესაც ვნახე რომ საზოგადოების გარკვეულ ნაწილს პოლიტიკაში ქართული ოცნების შემდგომ სიღარიბის ზღვარი გაუუარესდა. ორმა ბანკმა გადაჭამა მთელი ქვეყანა... ირღვეოდა ბალანსი სახელმწიფოს ინტერესებს და ბიზნესის ინტერესებს შორის და არღვევდა მას კვირიკაშვილი თავის ქმედებებით... მას აღარ შეეძლო მართვა. ორ კაცთან, ალავიძესთან და ქუმსიშვილთან ახერხებდა ის გადაწყვეტილებების შეთანხმებას..​​​​. მას არ დარჩა არჩევანი, ის უნდა წასულიყო და წავიდა კიდეც“, - განაცხადა ბიძინა ივანიშვილმა.​

გიორგი კვირიკაშვილი პრემიერმინისტრის თანამდებობიდან 13 ივნისს გადადგა და მიზეზად პარტიის თავმჯდომარე ბიძინა ივანიშვილთან, რიგ ფუნდამენტურ საკითხებზე უთანხმოება დაასახელა. „ქართულმა ოცნებამ“ მთავრობის ახალ ხელმძღვანელად მამუკა ბახტაძე დაასახელა, რომელმაც თავის მხრივ პარლამენტს დასამტკიცებლად კაბინეტის განახლებული შემადგენლობა წარუდგინა. რამდენიმე მინისტრთან ერთად ახალ კაბინეტში აღარ აღმოჩნდა არც ეკონომიკის ყოფილი მინისტრის დიმიტრი ქუმსიშვილის ადგილიც.

მალევე ცნობილი გახდა, რომ დიმიტრი ქუმსიშვილი და იფრასტრუქტურის ყოფილი მინისტრი ზურაბ ალავიძე პროკურატურაში გამოკითხეს. მოგვიანებით ამ საქმეზე ქვეყნის მთავარმა საგამოძიებო უწყებამ განმარტა, რომ ჯერ კიდევ მარტში მთავარი პროკურატურის საგამოძიებო ნაწილში დაიწყო გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება/გაფლანგვის ფაქტებზე.

არსებული ინფორმაციით, კვირიკაშვილის ეკონომიკური გუნდის მიმართ არსებულ პრეტენზიებში ფიგურირებს TBC ბანკის ხელმძღვანელის მამუკა ხაზარაძის სახელი და ანაკლიის პორტის პროექტი.