პრეზიდენტი უზენაესი სასამართლოს თავმჯდომარის შესარჩევად კონსულტაციებს 6 აგვისტოდან დაიწყებს

საქართველოს პრეზიდენტი გიორგი მარგველაშვილი ქვეყნის პირველი მოსამართლის თანამდებობიდან გადადგომას საგანგებო ბრიფინგით გამოეხმაურა.

როგორც პრეზიდენტმა თქვა, ყველაზე ნიშანდობლივი არის ნინო გვენეტაძის განცხადება, როდესაც ქვეყნის პირველი მოსამართლე ამბობს, რომ ძალადობის მსხვერპლია.

"მე მინდა, რომ ეს გადადგომაც არ იყოს ისევე მიჩქმალული, როგორც ბევრი მნიშვნელოვანი პოლიტიკური მოვლენა ჩვენს ცხოვრებაში. სასამართლო სისტემის გაჯანსაღება, იქ არსებული ვითარების შეცვლა ჩვენი დემოკრატიის წინაშე არსებული უმნიშვნელოვანესი გამოწვევაა. თუ ჩვენ ამ გამოწვევას არ ვუპასუხებთ, დავრჩებით იმ მანკიერ წრეზე, რომელსაც არაერთი სერიოზული პრობლემა შეუქმნია ჩვენი ქვეყნის მოქალაქეებისა და სახელმწიფო სისტემისთვის“, - განაცხადა მარგველაშვილმა.

პრეზიდენტის თქმით, უზენაესი სასამართლოს თავმჯდომარის შესარჩევად კონსულტაციებს 6 აგვისტოდან დაიწყებს. მისივე თქმით, ეს იქნება ღია კონსულტაციები.

„დღეს განსაკუთრებით მინდა მოგიწოდოთ აკადემიური სფეროს წარმომადგენლებს, იურისტებს, იმ ადამიანებს, ვინც წლების განმავლობაში საქართველოს სასამართლო სისტემის გაჯანსაღებაზე მუშაობდნენ, ჩაერთოთ ამ პროცესში, რომლის მიზანიც უნდა იყოს ისეთი ადამიანის შერჩევა, რომელსაც ექნება საკმარისი კვალიფიკაცია, მორალური ძალა და რომელიც შეძლებს დაიწყოს სასამართლო სისტემის გაჯანსაღება", - განაცხადა პრეზიდენტმა.

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობიდან წასვლის შესახებ განცხადება დღეს გაავრცელა. მისი გადაწყვეტილება მოულოდნელი აღმოჩნდა, როგორც იუსტიციის უმაღლესი საბჭოს წევრებისთვის, ასევე პოლიტიკოსებისთვის.

2017 წლის ნოემბერში ნინო გვენეტაძეს და იუსტიციის უმაღლესი საბჭოს წევრებს შორის მოსამართლეთა უვადო დანიშვნასთან დაკავშირებით კონფლიქტი წარმოიქმნა. მაშინ ვრცელდებოდა ინფორმაცია, რომ ამ დაპირისპირების გამო გვენეტაძემ თანამდებობიდან წასვლა გადაწყვიტა, რაც არ დადასტურდა და მან 34 მოსამართლის უვადოდ დანიშვნას ხელი მოაწერა.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.

2017 წლის ნოემბერში ნინო გვენეტაძეს და იუსტიციის უმაღლესი საბჭოს წევრებს შორის მოსამართლეთა უვადო დანიშნვნასთან დაკავშირებით კონფლიქტი წარმოიქმნა.  მაშინ ვრცელდებოდა ინფორმაცია, რომ ამ დაპირისპირების გამო გვენეტაძემ თანამდებობიდან წასვლა გადაწყვიტა, რაც არ დადასტურდა და მან 34 მოსამართლის უვადოდ დანიშვნას ხელი მოაწერა.

საქართველოს უზენაესი სასამართლოს თავმჯდომარეს კონსტიტუციის მოქმედი რედაქციით წარადგენს ისევ საქართველოს პრეზიდენტი და ირჩევს საქართველოს პარლამენტი 10 წლის ვადით. პრეზიდენტს კანდიდატის წარდგენა ხვალვე შეუძლია, პარლამენტს კი მისი დამტკიცება - რიგგარეშე ან საშემოდგომო სესიაზეც. თუ პროცედურა გაჭიანურდა საპრეზიდენტო არჩევნებამდე და უზენაესი სასამართლოს ახალ თავმჯდომარეს პარლამენტი 2018 წლის ოქტომბრამდე არ აირჩევს, ახალი პრეზიდენტის ინუგურაციის შემდეგ ამოქმედდება ახალი კონსტიტუცია, რომელიც უზენაესი სასამართლოს თავმჯდომარის არჩევის განსხვავებულ პროცედურას ითვალისწინებს. მას 10 წლის ვადით ისევ პარლამენტი ამტკიცებს, მაგრამ არა პრეზიდენტის, არამედ უზენაესი სასამართლოს წევრთანაგან იუსტიციის უმაღლესი საბჭოს წარდგინებით. სასამართლოს ახალი ხელმძღვანელის არჩევამდე უზენაესი სასამართლოს თავმჯდომარის მოვალეობას ასრულებს მისი პირველი მოადგილე.