ბახტაძე: თუ ოქუაშვილს რაიმე ფაქტები აქვს, მან ისინი ერთად უნდა შეკრას და საგამოძიებო ორგანოს მიაწოდოს

ტელეკომპანია "იბერიისა" და "ომეგა ჯგუფის" საქმესთან დაკავშირებით, "ქართული ოცნება - დემოკრატიული საქართველოს" ცენტრალურ ოფისში გამართული ბრიფინგის შემდეგ, განცხადებები პარლამენტის თავმჯდომარემ ირაკლი კობახიძემ და პრემიერმინისტრმა მამუკა ბახტაძემ გააკეთეს.

ირაკლი კობახიძემ ამ თემას ზაზა ოქუაშვილის მიერ დადგმული სპექტაკლი უწოდა, რომელშიც ხელი "ნაციონალურმა მოძრაობამ" შეუწყო.

"ნაცმოძრაობა არის ზუსტად ის პოლიტიკური ძალა, რომელმაც ზაზა ოქუაშვილს წაართვა ბიზნესი და ტელევიზია. ახლა ოქუაშვილი შეკრულია ამ პოლიტიკურ ძალასთან და აბსოლუტურად გაუგებარი აუდიოჩანაწერებით, სადაც გაუგებარია, რაზეა საუბარი და ვინ საუბრობს, ის ცდილობს ქართული ოცნების დისკრედიტირებას. ბუნებრივია, ეს არის ის სპექტაკლი, რომელიც ჩვენ გვახსოვს მთელი ამ წლების განამვლოაბში. ეს ნაცმოძრაობის და რუსთავი 2-ის ხელწერაა", - განაცხადა ირაკლი კობახიძემ.

კობახიძის თქმით, ზაზა ოქუაშვილი ყველაფერს იწერდა და თურმე როგორც თავად ამბობს, ის შეხვედრია ბიძინა ივანიშვილს, "თუმცა როგორც ჩანს, იქ ჩაწერა არ განუხორციელებია. ზაზა ოქუაშვილი არის ის ადამიანი, რომელმაც ქართული ოცნების ხმარდაჭერით მოახერხა საკუთარი ბიზნესის და ტელევიზიის დაბრუნება. ეს ქართულმა ოცნებამ სრულიად უანგაროდ გააკეთა.... ლევან ყიფიანს ქართულ ოცნებასთან არანაირი კავშირი არ აქვს, შესაბამისად, ჩვენი ინტერესი ლევან ყიფიანთან საუბარი არ არის", - განაცხადა ირაკლი კობახიძემ. 

"ბიზნესზე პოლიტიკური ზეწოლის არცერთი შემთხვევა და ფაქტი არ არსებობს, შესაბამისად, ვერავინ ვერ წარმოადგენს ვერცერთ მტკიცებულებას", - დასძინა ირაკლი კობახიძემ.

პრემიერმინისტრ მამუკა ბახტაძის განცხადებით კი თუ ზაზა ოქუაშვილს რაიმე ფაქტები აქვს, მან ეს ფაქტები ერთად უნდა შეკრას და თავისი იურისტის მეშვეობით, საგამოძიებო ორგანოებს უნდა წარუდგინოს.

"ასე ხდება ცივილურ საზოგადობებში. მაგრამ როდესაც ამას აქვს რაღაცა პროცესის შექმნის იმიტაცია, მაშინ რა თქმა უნდა, ძალიან ბევრი შეკითხვა ჩნდება. მეც და საზოგადოების დიდ ნაწილსაც უჩნდება ეს კითხვები. 

ჩვენ უნდა გავყოთ ის საკითხი, რომლის გაყოფაც არ სურს, როგორც ჩანს, ზაზა ოქუაშვილს - ეს არის საქმე, რომელიც ეხება გადასახადების გადახდას და დანარჩენი კი არის ყველა სხვა ეპიზოდი. არ არსებობს ინდულგეცია იმისთვის, რომ გადასახადი არ გადაიხადო. უფრო მეტი უპასუხისმგებლობა გახლავთ ის, რომ ტელეკომპანიის საქმიანობა თურმე კითხვის ნიშნის ქვეშ დგება, იქიდან გამომდინარე, რომ გადასახადებს არ იხდის თამბაქოს მწარმოებელი ქარხანა. ეს ჩემთვის პრინციპულად მიუღებელია, ეს არის უპასუხისმგებლობის ზენიტი", - განაცხადა მამუკა ბახტაძემ.

პრემიერმა კიდევ ერთხელ განმარტა, თუ როგორ დააგროვა "ომეგა ჯგუფმა" ამდენი ლარის დავალიანება. პრემიერის თქმით, როდესაც ფინანსთა მინისტრი იყო, არაერთხელ თქვა, რომ მისთვის მნშვნელოვანი სამუშაო ადგილები იყო და ნებისმიერი ვინც ერთ სამუშაო ადგილს ქმნის "ძალიან დიდ პატივისცემას და მხარდაჭერას იმსახურებს საქართველოს მთავრობის მხრიდან".

"შესაბამისად, როდესაც ორგანიზაცია მოდის და ამბობს, რომ მას ამ საქმიანობის გაგრძელება სურს, მას სურს სამუშაო ადგილების შენარჩუნება, სახელმწიფო მას აუცილებლად უნდა დაუდგეს გვერდში. მე როცა ფინანსთა მინისტრი ვიყავი, ამ ორგანიზაციას უკვე ჰქონდა მსხვილი დავალიანება, შესაბამისად ეს დავალიანება კიდევ უფრო გაიზარდა. სახელმწიფომ მაქსიმალურად გააკეთა ყველაფერი - 11-ჯერ მოახდინა შემოსავლების სამსახურმა იმ ნაბიჯების გადავადება, რომლებიც ასეთ პერიოდში დგება ხოლმე. ეს კიდევ ერთხელ მიუთითებს კეთილგანწყობას. თუმცაღა, რა თქმა უნდა, როგორ დააგროვა მან (ომეგა ჯგუფმა) ეს დავალიანება თავის დროზე, ამასთან დაკავშირებით შეიძლება არსებობდეს ობიექტური შეკითხვები და მათ პასუხი აუცილებლად უნდა გაეცეთ", - განაცხადა პრემიერმინისტრმა მამუკა ბახტაძემ.

პრემიერმინისტრმა ასევე კომენტარი გააკეთა ზაზა ოქუაშვილის ნათქვამზე, რომლის თანახმადაც ბიძინა ივანიშვილი ფულს ითხოვდა: "ზაზა ოქუაშვილის განცხადება შევა კიდევ ერთი ანეკდოტების სიაში, რომელსაც ჩვენ არაერთხელ შევხვედრივართ. ანეკდოტურია, ღიმილის მომგვრელია ჩემთვის. მე რომ ეს წავიკითხე, ეს ჩემთვის იყო ღიმილის მომგვრელი, რომ ბიძინა ივანიშვილი ფულს სთხოვს მეწარმეს", - განაცხადა ბახტაძემ.

"ომეგა ჯგუფისა" და "იბერიის" საქმეზე საუბარი "ქართული ოცნება-დემოკრატიული საქართველოს"განცხადებაშიც არის, რომელიც დღეს კახა კალაძემ წაიკითხა. კალაძემ "იბერიის" საქმეს "გამოგონილი" უწოდა და განაცხადა, რომ ომეგა ჯგუფისა და ნაციონალების "ატაცებული ბინძური კამპანიაა", რომლის მიზანიც, კალაძის თქმით, ბიუჯეტის კუთვნილი 50 მილიონის გადაუხდელობა და ხელისუფლების იმიჯის შელახვაა. კალაძის განცხადებით, ზაზა ოქუაშვილი თავის ყოფილ ჯალათ სააკაშვილს შეეკრა და ცდილობს, ხალხის ფული აღარ გადაიხადოს. 

26 სექტემბერს გაირკვა, რომ "ომეგა ჯგუფმა" ლონდონის სასამართლოში საქართველოს მოქმედი და ყოფილი მაღალჩინოსნების წინააღმდეგ სამართლებრივი პროცედურა დაიწყო. ამის შესახებ "ომეგა ჯგუფის" ადვოკატმა კოლინ გიბსონმა თქვა. 

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო, ჩანაწერებზე ექსპერტიზის ჩატარება იგეგმება. 

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია, კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.