თუ უმრავლესობას 7 დეპუტატი დატოვებს, „ევროპული საქართველო“ უმცირესობის სტატუსს დაკარგავს

პარლამენტის წევრი დავით ჭიჭინაძე ფიქრობს, რომ უმრავლესობას 7 დეპუტატი დატოვებს, რის შემდეგაც „ევროპული საქართველო“ საპარლამენტო უმცირესობის სტატუსს დაკარგავს. ჭიჭინაძის განმარტებით, უმრავლესობიდან 7 დეპუტატის გამოსვლის შემთხვევაში უმცირესობა დაიშლება, რადგან უმცირესობაში მყოფი დეპუტატების რაოდენობა უმცირესობის გარეთ მყოფთა რაოდენობას გადააჭარბებს. მის კომენტარს 1tv.ge ავრცელებს.

"ახალი უმცირესობის შექმნის საშუალებაც იქნება. ბევრი სხვადასხვა შეხედულების ადამიანს მიეცემა შესაძლებლობა, სხვადასხვა ფრაქცია შექმნას, მაგრამ ახალ უმცირესობაში გაერთიანდნენ. ეს იქნება ერთი წინ გადადგმული ნაბიჯი ახალი უმცირესობის შესაქმნელად. ქვეყანაში ალტერნატიულ ძალას ითხოვენ და ეს რეალურია საპარლამენტო ცხოვრებაში”, – განაცხადა დავით ჭიჭინაძემ.

"ევროპული საქართველოს" წევრი, დეპუტატი ირაკლი აბესაძე ამბობს, რომ განსაკუთრებული არაფერია თუ "ევროპული საქართველო" უმცირესობის სტატუსს დაკარგავს. მან უმრავლესობაში მიმდინარე პროცესებს პოლიტიკური თამაშები უწოდა და თქვა, რომ რეალურად, უმრავლესობას არ ანაღვლებს არც სასამართლოს დამოუკიდებლობა და არც სახელმწიფო სისტემაში არსებული კორუფცია.

„მათ მხოლოდ ძალაუფლების გადანაწილება და ივანიშვილის კარზე უპირატესობის მოპოვება ანაღვლებთ. თუ ამ პროცესის შედეგი ის იქნება, რომ რამდენიმე დეპუტატი უმრავლესობას გამოეყოფა, სამწუხაროდ, საზოგადოებისთვის ამას არანაირი დადებითი ცვლილება არ მოჰყვება.

საპარლამენტო სტატუსი დამოკიდებულია დეპუტატების რიცხოვნობაზე და თუ ისეთ კონფიგურაციას მივიღებთ, რის შესაძლებლობასაც რეგლამენტი მოგვცემს, ამაში განსაკუთრებულს ვერაფერს ვხედავ. ცინიკურია, რომ საზოგადოებას შესთავაზონ წარმატებად და წინ გადადგმულ ნაბიჯად ის, რაც დაკავშირებულია საკუთარი პოლიტიკური ინტერესების დაკმაყოფილებასთან, უმრავლესობის შიდა პოლიტიკურ ინტრიგებს ვგულისხმობ”, – განაცხადა აბესაძემ.

ამ დროისთვის „ევროპულ საქართველოს“ პარლამენტში 20 დეპუტატი ჰყავს და საპარლამენტო უმცირესობის სტატუსი აქვს; უმრავლესობას – 115 დეპუტატი ჰყავს; უმცირესობისა და უმრავლესობის გარეთ, კერძოდ ექვს-ექვსი დეპუტატია ორ ფრაქციაში – „ნაციონალურ მოძრაობასა“ და „პატრიოტთა ალიანსში“, ორი კი დამოუკიდებელი დეპუტატია – ნატო ჩხეიძე და მამუკა ჩიქოვანი.

იმ შემთხვევაში, თუ უმრავლესობას შვიდი დეპუტატი დატოვებს, უმცირესობის გარეთ 21 დეპუტატი იქნება, უმცირესობაში კი 20 პარლამენტარია. საპარლამენტო უმცირესობას პარლამენტში საკითხების განხილვისას ეთმობა მეტი დრო, ჰყავს აპარატი, მოქმედებს საპარლამენტო უმცირესობის ლიდერის თანამდებობაც.

6 თებერვალს "ქართული ოცნების" ცენტრალურ ოფისში უმრავლესობის სხდომა გაიმართა, რომლის დასრულების შემდეგაც დეპუტატმა ეკა ბესელიამ განაცხადა, რომ უმრავლესობის დატოვებაზე გადაწყვეტილებას რამდენიმე დღეში მიიღებს. უმრავლესობა მასთან ერთად შესაძლოა კიდევ რამდენიმე დეპუტატმა დატოვოს. 

მმართველ გუნდში აზრთა სხვადასხვაობა მოსამართლეების უვადო დანიშვნის საკითხს უკავშირდება.