მამუკა ხაზარაძე და ბადრი ჯაფარიძე „თიბისი“ ბანკზე სასაუბროდ პარლამენტში მივლენ

მამუკა ხაზარაძე და ბადრო ჯაფარიძე ერთობლივ განცხადებას ავრცელებენ და თანხმობას აცხადებენ საპარლამენტო უმცირესობის შეთავაზებაზე, დეპუტატებმა მოუსმინონ „თიბისი“ ბანკის ხელმძღვანელებს.

„მივესალმებით პარლამენტის წევრების მზაობას, შესაბამის კომიტეტებში მოსმენილ იქნას ინფორმაცია 11 წლის წინ განხორციელებულ ტრანზაქციებთან დაკავშირებით. მზად ვართ, დეპუტატებისთვის ხელსაყრელ დროს მივიღოთ მონაწილეობა შესაბამისი ფორმატის შეხვედრაში“, - ნათქვამია ოფიციალურ წერილში, რომელსაც მამუკა ხაზარაძე და ბადრი ჯაფარიძე ერთობლივად ავრცელებენ. 

„თიბისი ბანკის“  სამეთვალყურეო საბჭოს თავმჯდომარემ მამუკა ხაზარაძემ და მისმა მოადგილემ ბადრი ჯაფარიძემ ბანკის გარშემო დაწყებული სკანდალის შემდეგ პირველი სატელივიზიო კომენტარი გააკეთეს.

დღეს მათ პრესკონფერენცია გამართეს და თქვეს, რომ მზად არიან დიალოგის გზით ეროვნულ ბანკთან ერთად, გამოსავლის ძიებაზე დაიწყონ მსჯელობა.  

რაც შეეხება პროკურატურის მიერ დაწყებულ გამოძიებას ფულის გათეთრების მუხლით, ამ ფაქტს ბანკირები კატეგორიულად გამორიცხავენ. სადავო 17 მილიონ დოლართან დაკავშირებით მამუკა ხაზარაძემ დღეს პირველად განაცხადა, რომ ეს თანხა გადარიცხულია მსოფლიო ბანკსა და „თიბისი ბანკის“ კაპიტალში.

კითხვა დაისვა ანაკლიის პორტთან დაკავშირებით. მამუკა ხაზარაძე ამბობს, რომ პროკურატურის მიერ დაწყებული დაჩქარებული გამოძიება, პირდაპირ ურტყამს ხელშეკრულების გაფორმების პროცედურას, თუმცა „თიბისი ბანკის“ სამეთვალყურეო საბჭოს თავმჯდომარე აქვე ამბობს იმასაც, რომ სახელმწიფო მხარში უდგას ამ პროექტს.

საქართველოს იუსტიციის მინისტრმა თეა წულუკიანმა "იმედი LIVE"-ის პირდაპირ ეთერში თქვა, რომ თავად მამუკა ხაზარაძე და ყველა პირი, რომელსაც ეს საქმე ეხება, ყველაფერს უნდა აკეთებდნენ, იმისთვის, რომ მათთან პიროვნულად დაკავშირებულმა კითხვებმა ბანკი არ დააზიანოს. ეკონომიკის მინისტრის, გიორგი ქობულიას თქმით კი ანაკლიის პროექტს მთავრობის სრული მხარდაჭერა აქვს და ხაზარაძე უბრალოდ შემსრულებელია.

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.