ეკონომიკური გუნდის მინისტრები: ანაკლიის პროექტი და თიბისის საქმე უნდა გაიმიჯნოს

მამუკა ხაზარაძე და ბადრი ჯაფარიძე მზად არიან "თიბისი ბანკზე" სასაუბროდ პარლამენტში მივიდნენ. ასე გამოეხმაურნენ ბანკირები საპარლამენტო უმცირესობის შეთავაზებას.

„მივესალმებით პარლამენტის წევრების მზაობას, შესაბამის კომიტეტებში მოსმენილ იქნას ინფორმაცია 11 წლის წინ განხორციელებულ ტრანზაქციებთან დაკავშირებით. მზად ვართ, დეპუტატებისთვის ხელსაყრელ დროს მივიღოთ მონაწილეობა შესაბამისი ფორმატის შეხვედრაში“, - ნათქვამია ოფიციალურ წერილში, რომელსაც მამუკა ხაზარაძე და ბადრი ჯაფარიძე ერთობლივად ავრცელებენ. 

"თიბისის საქმის" ირგვლივ განვითარებულ მოვლენებზე ეკონომიკური გუნდის მინისტრებმა გააკეთეს კომენტარები. ვიცეპრემიერის, მაია ცქიტიშვილის განცხადებით, უნდა გაიმიჯნოს ანაკლიის პორტის მშენებლობა და საგამოძიებო მოქმედებები.

ფინანსთა მინისტრი ივანე მაჭავარიანი კატეგორიულად გამორიცხავს, რომ „თიბისი ბანკთან“ დაკავშირებით მიმდინარე გამოძიება ანაკლიის პროექტს უკავშირდებოდეს.

მე გამოვრიცხავდი, რომ ანაკლიას უკავშირდებოდეს, პირიქით, ანაკლიის პროექტის შემთხვევაში ხელისუფლება მაქსიმალურად მხარს უჭერს ამ პროექტის განვითარებას. არანაირი კავშირი არ აქვს, დარწმუნებული ვარ ამაში. ამავდროულად, მინდა გითხრათ, რომ ეს ანაკლიას და საკუთრივ თიბისი ბანკს და საფინანსო სისტემას საქართველოში არ ემუქრება არანაირი საფრთხე“, - განაცხადა მაჭავარიანმა. 

საქართველოს იუსტიციის მინისტრმა თეა წულუკიანმა "იმედი LIVE"-ის პირდაპირ ეთერში თქვა, რომ თავად მამუკა ხაზარაძე და ყველა პირი, რომელსაც ეს საქმე ეხება, ყველაფერს უნდა აკეთებდნენ, იმისთვის, რომ მათთან პიროვნულად დაკავშირებულმა კითხვებმა ბანკი არ დააზიანოს. ეკონომიკის მინისტრის, გიორგი ქობულიას თქმით კი ანაკლიის პროექტს მთავრობის სრული მხარდაჭერა აქვს და ხაზარაძე უბრალოდ შემსრულებელია.

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო. 

„თიბისი ბანკი“ ინგლისურ ენაზე გავრცელებულ განცხადებაში იმას წერს, რაზეც ქართულენოვანში საუბარი არაა. კერძოდ ბანკი ადასტურებს, რომ ეროვნულმა ბანკმა ერთი მილიონი ლარით დააჯარიმა.

თიბისი ბანკმა ეროვნული ბანკის ადმინისტრაციული აქტების ბათილად ცნობის მოთხოვნით სასამართლოში სარჩელი შეიტანა. შესაბამის განცხადებას ბანკმა საკუთარ გვერდზე გაავრცელა.