გიორგი გახარია: მე წერილებს არ ვწერ, სათქმელს ყველას პირში ვეუბნები

შინაგან საქმეთა მინისტრმა გიორგი გახარიამ "თიბისი ბანკის" დამფუძნებლის ბრალდებასთან დაკავშირებით პირველი კომენტარი გააკეთა. კომენტარი მან ბოლნსიში, პოლიციის ახალი შენობის გახსნის შემდეგ ჟურნალისტებთან გააკეთა.

გიორგი გახარიას განცხადებით, ეს იყო ერთი პრივილეგირებული ბიზნესმენის მცდელობა, რომ პარლამენტიდან ეჭორავა. "მე წერილებს არ ვწერ და სათქმელს პირში ვეუბნები ყველას", - განაცხადა გიორგი გახარიამ.

მინისტრის განცხადებით, ამ ქვეყანაში პრივილეგირებულობა უნდა დასრულდეს. "შანტაჟის ენით საუბარი უნდა გაქრეს, ყველას მოუწევს პასუხი აგოს როგორც თავის ვალდებულებებზე, ასევე სიტყვებზე", -განაცხადა მინისტრმა გიორგი გახარიამ.

დღეს პარლამენტში საკომიტეტო მოსმენის დროს, "თიბისი ბანკის" დამფუძნებელმა მამუკა ხაზარაძემ განაცხადა, რომ არჩევნების მეორე ტურის წინ მან შს მინისტრისგან, გიორგი გახარიასგან მუქარის შემცველი წერილი მიიღო. 

"წერილი იყო მოწერილი შინაგან საქმეთა მინისტრისგან, გიორგი გახარიასგან. მე მინდა, რომ არ აღმოვჩნდე იმ სიტუაციაში, რომ წერილებით დავიწყო სირბილი მედიის და ჟურნალისტების წინაშე. ეს იყო მუქარის შემცველი წერილი რაღაცის შესრულების საფასურად, რაც ჩვენ არ გავაკეთეთ და არც გავაკეთებთ", - განაცხადა მამუკა ხაზარაძემ.

ამასთან დაკავშირებით, საქართველოს პროკურატურამ განაცხადა, რომ მამუკა ხაზარაძეს გამოკითხავს. 

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეო სქემა, რომლითაც „თიბისი ბანკის“ საქმე აღწერა.