ამირან გამყრელიძე ჟურნალისტებს: ახლა მე აქედან რომ გავალ, ხელები უნდა დავიმუშავო, თქვენც ასე უნდა გააკეთოთ

ზოგადი რეკომენდაცია, რასაც ვიძლევით ნებისმიერი რესპირაციული ინფექციის დროს, ეს არის ზოგადი, საზოგადოებრივი და პირადი ჰიგიენის მაქსიმალურად დაცვა, - ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ საგანგებო ბრიფინგზე განაცხადა.

მისი თქმით, მათ სპეციალური რეკომენდაციები დადეს ჟურნალისტებისთვის, თუ როგორ უნდა იმუშაონ რესპონდენტებთან.

ახლა მე აქედან რომ გავალ, ხელები უნდა დავიმუშავო, თქვენც ასე უნდა გააკეთოთ, რომ ჩახვალთ დაბლა, დარწმუნებული ვარ, დისპენსერები არის, დაიმუშავეთ ხელები. ასევე, გაეცანით ჩვენს სპეციალურ რეკომენდაციებს ჟურნალისტებისათვის, როგორ უნდა მოიქცეთ რესპონდენტებთან“ - განაცხადა ამირან გამყრელიძემ.

ცოტა ხნის წინ ცნობილი გახდა, რომ საქართველოში კორონავირუსის 5 ახალი შემთხვევა გამოვლინდა. ამ დროისთვის უკვე ჯამში 9 შემთხვევაა დადასტურებული. საქართველოს მთავრობის მიერ შექმნილ სპეციალური ვებგვერდის თანახმად, კარანტინის რეჟიმშია 162 ადამიანი, ხოლო სტაციონარში მეთვალყურეობის ქვეშ – 45.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე 29 თებერვალს, მეოთხე კი 5 მარტს დადასტურდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.