მიხეილ ჩხენკელი: ადრონული თერაპიის ცენტრში ორი ციკლოტრონი გვექნება, რომელთა აწყობა უკვე დაწყებულია მსოფლიოს ერთ-ერთ წამყვან კომპანიაში და ეს პროექტიც მთლიანად დაფინანსებულია ფონდ „ქართუს“ მიერ

ქვეყნის განვითარება შეუძლებელია მეცნიერების განვითარების გარეშე, შესაბამისად, მეცნიერებასა და სამეცნიერო-კვლევით პროცესზე ზრუნვა იქნება ჩვენი გუნდის ცალსახა პრიორიტეტი, - ამის შესახებ საქართველოს განათლების, მეცნიერების, კულტურისა და სპორტის მინისტრმა, მიხეილ ჩხენკელმა „ქართული ოცნება - დემოკრატიული საქართველოს“ 2020 წლის საარჩევნო პროგრამის თემატური პრეზენტაციაზე განაცხადა.

მისი თქმით, საგრძნობლად გაიზრდება მეცნიერების დაფინანსება.

„ეს შეეხება როგორც საგრანტო კონკურსებს, ასევე კვლევითი პროცესების ხელშეწყობას სახელმწიფოს მხრიდან. ძალიან მნიშვნელოვანია ჩვენი ქართული სამეცნიერო სათვისტომოს ჩართვა სამეცნიერო კვლევით პროცესში, ძალიან დიდი პოტენციალია საზღვარგარეთ. ქართველი მეცნიერები, რომლებიც საზღვარგარეთ მოღვაწეობენ, უფრო აქტიურად იქნებიან ჩართული სამეცნიერო კვლევით საქმიანობაში, ისევე, როგორც წამყვანი უცხოელი პროფესორები, მეცნიერები იქნებიან აქტიურად იქნებიან ჩართული ქართველ მეცნიერებთან ერთად კვლევებში. ძალიან დიდ ყურადღებას მივაქცევთ გამოყენებითი მეცნიერების კომერციალიზაციას. აქ მნიშვნელოვანია, რომ მეცნიერება დაუკავშირდეს ეკონომიკას, რომ თითოეულმა ოჯახმა იგრძნოს ის მნიშვნელოვანი ეფექტი, რომელსაც მეცნიერება იძლევა. როდესაც ჩვენ მეცნიერებაზე ვსაუბრობთ მინდა განსაკუთრებით გამოვყო ამ მიმართულების მთავარი მეგა პროექტი, რომელიც სულ რამდენიმე წელიწადში განხორციელდება. ეს გახლავთ ადრონული თერაპიის ცენტრი, რომელიც ქუთაისის საერთაშორისო უნივერსიტეტის ბაზაზე იფუნქციონირებს. ადრონული თერაპიის ცენტრში ჩვენ გვექნება ორი ციკლოტრონი, რომელთა აწყობა უკვე დაწყებულია მსოფლიოს ერთ-ერთ წამყვან კომპანიაში და ეს პროექტიც მთლიანად დაფინანსებულია ფონდ „ქართუს“ მიერ. პირველი ციკლოტრონი მოხმარდება სიმსივნის მკურნალობას ულტრათანამდეროვე მეთოდებით, ეს გახლავთ პროტონული თერაპია, რაც განსაკუთრებით მნიშვნელოვანია სიმსივნით დაავადებული ბავშვების მკურნალობისთვის, ხოლო მეორე ციკლოტრონი მთლიანად მოხმარდება სამეცნიერო კვლევით პროცესს ონკოლოგიაში, ბირთვულ ფიზიკაში და სამედიცინო ფიზიკაში. მე პირადად შევხვდი მსოფლიოს წამყვან მეცნიერებს, ამ მიმართულებების წარმომადგენლებს და მათ დიდი ენთუზიაზმი და მზაობა დააფიქსირეს, რომ ჩამოვიდნენ ქუთაისში და ქართველ მეცნიერებთან ერთად აწარმოონ სამეცნიერო კვლევითი პროცესი. ეს ნიშნავს, რომ ქუთაისის საერთაშორისო უნივერსიტეტმა და ადრონული თერაპიის ცენტრმა საქართველო დასვა მსოფლიო აკადემიურ და სამეცნიერო კვლევით რუკაზე. ეს არის უაღრესად მნიშვნელოვანი ნაბიჯია განათლებული და წარმატებული საქართველოსთვის“, - განაცხადა მიხეილ ჩხენკელმა.