გიორგი ამილახვარი: მნიშვნელოვნად გაიზრდება უმაღლესი განათლების დაფინანსება და ჩამოყალიბდება დაფინანსების სრულიად ახალი მოდელი

მივიღეთ გადაწყვეტილება, რომ მნიშვნელოვნად გავზარდოთ უმაღლესი განათლების დაფინანსება და, ამავდროულად, ჩამოვაყალიბოთ დაფინანსების კონცეპტუალურად სრულიად ახალი მოდელი. ის დაეფუძნება სწავლის შედეგებს, რაც უზრუნველყოფს ხარისხიან, ხელმისაწვდომ განათლებას, - ამის შესახებ „ქართული ოცნების“ საარჩევნო პროგრამის თემატურ პრეზენტაციაზე თბილისის ღია უნივერსიტეტის რექტორმა, გიორგი ამილახვარმა განაცხადა.

„განსაკუთრებული მნიშვნელობა ენიჭება ხარისხიანი უმაღლესი განათლების არსებობას ქვეყანაში მისი სამომავლო განვითარების თვალსაზრისით. ჩვენი მიზანია, რომ უმაღლესი სასწავლებლების კურსდამთავრებულებს ისეთი ცოდნა და უნარები ჰქონდეთ, რაც მათ გახდის კონკურენტუნარიანებს მსოფლიო ასპარეზზე და შესაბამისობაში იქნება თანამედროვე დასაქმების ბაზრის მოთხოვნასთან. დღეს შრომის ბაზრის მოთხოვნებმა ახალი პრიორიტეტები ჩამოაყალიბა, რამაც უმაღლესი განათლების არსებული დაფინანსების მოდელის გადახედვის აუცილებლობა გამოიწვია. მივიღეთ გადაწყვეტილება, რომ მნიშვნელოვნად გავზარდოთ უმაღლესი განათლების დაფინანსება და, ამავდროულად, ჩამოვაყალიბოთ დაფინანსების კონცეპტუალურად სრულიად ახალი მოდელი. ის დაეფუძნება სწავლის შედეგებს, რაც უზრუნველყოფს ხარისხიან, ხელმისაწვდომ განათლებას“, - განაცხადა ამილახვარმა.

მისივე თქმით, ამის შედეგად ამაღლდება აკადემიური სწავლების ხარისხი, მკვეთრად გაუმჯობესდება საუნივერსიტეტო ინფრასტრუქტურა და სამეცნიერო-კვლევითი პოტენციალი.

„განვლილი წლების განმავლობაში საქართველომ მნიშვნელოვანი ნაბიჯები გადადგა უმაღლესი განათლების ხარისხის თავსებადობის კუთხით ევროკავშირის სტანდარტებთან და ეს მომდევნო წლებშიც გაგრძელდება, რათა ჩვენ ღირსეული ადგილი დავიმკვიდროთ დიდ ევროპულ საგანმანათლებლო ოჯახში. სახელმწიფოს მხრიდან აქტიურად იქნება მხარდაჭერილი საერთაშორისო აკრედიტაციის პროცესი, ერთობლივი და ორმაგი დიპლომების პროგრამების დანერგვა. ამის შედეგად უმაღლესი სასწავლებლების კურსდამთავრებულებს ექნებათ ისეთივე ცოდნა, როგორც მათ თანატოლებს მსოფლიოს სხვა განვითარებულ ქვეყნებში. ამის ერთ-ერთი ნათელი მაგალითია ქუთაისის საერთაშორისო უნივერსიტეტია. მომდევნო წლების განმავლობაში საქართველო მომზადდება Erasmus+ პროგრამულ ქვეყნად და წვდომას მიიღებს ამ პროგრამის ყველა კომპონენტზე. ჩვენს მოსწავლეებს, მასწავლებლებს, სტუდენტებს, პროფესორებს, სპორტსმენებს, ახალგაზრდებს ექნებათ საშუალება, ჩაერთვნენ საერთაშორისო მობილობაში და სხვადასხვა გაცვლით პროგრამაში“, - განაცხადა ამილახვარმა.