ელისო ბოლქვაძე: „ქართული ოცნების“ მიერ შემუშავებული პროგრამა საწინდარია საქართველოს მიერ საერთაშორისო სივრცეში განსაკუთრებული ადგილის დასამკვიდრებლად

„ქართული ოცნების“ მიერ შემუშავებული მრავალმხრივი კულტურული სტრატეგიის განვითარების პროგრამა საწინდარია საქართველოს საერთაშორისო სივრცეში განსაკუთრებული ადგილის დასამკვიდრებლად, რაც მნიშვნელოვნად დააჩქარებს ევროინტეგრაციის პროცესს. ხელოვნება აერთიანებს ერებს და კულტურული დიპლომატია ყველაზე საიმედო გარანტიაა მშვიდობისათვის, - ამის შესახებ „ქართული ოცნების“ საარჩევნო პროგრამის თემატურ პრეზენტაციაზე მუსიკოსმა, ელისო ბოლქვაძემ განაცხადა.

„დღევანდელ მსოფლიოში ერების დაახლოების კონტექსტში კულტურა ძალიან დიდ როლს თამაშობს. სხვადასხვა იდენტობის მქონე ხალხთა კულტურული კავშირები ამდიდრებს ერთიანი ევროპის იდეას და გლობალურად ხელს უწყობს კაცობრიობის განვითარებას. საქართველო თავისი მდიდარი ისტორიითა და მისწრაფებებით უძველესი და გამორჩეული ქვეყანაა, რომელსაც თავისი ღირსეული ადგილი უკავია თანამედროვე მსოფლიოში. სწორედ ამ ტრადიციის გასაგრძელებლად და პოზიციების გასამყარებლად შემუშავდა „ქართული ოცნების“ მომავალი 4 წლის პროგრამა. 2021 წელს შემოდგომაზე ქუთაისი უმასპინძლებს ევროპის საბჭოს უმნიშვნელოვანეს საერთაშორისო ფორუმს, რაც ქუთაისს კულტურის დედაქალაქ გადააქცევს. პირველ რიგში, კულტურა არის სულიერი და ესთეტიური საზრდო, თვითგამოხატვისა და იდენტობის ჭეშმარიტი საშუალება. კულტურა განსაკუთრებულ როლს თამაშობს ქვეყნის სოციალურ-ეკონომიკურ განვითარებაში. სწორედ ამიტომ, ჩვენი გუნდის მიზანია, კიდევ უფრო მეტად შევუწყოთ ხელი და წავახალისოთ შემოქმედებითი ინდუსტრიები. მნიშვნელოვანია ქართული ისტორიული ძეგლების გაცოცხლება კულტურული ტურიზმისა და საფესტივალო პროგრამების სწორი განვითარების საშუალებით. დაგეგმილია ქართული დღეების ჩატარება ევროპის სხვადასხვა ქალაქში, რაც ხელს შეუწყობს ქვეყნის პოპულარიზაციას და პოზიციონირებას მსოფლიო სივრცეში“, - განაცხადა ელისო ბოლქვაძემ.

მისივე თქმით, 2022 წელს ევროპისა და ბენილუქსის ქვეყნებში იგეგმება ქართული კულტურის ზეიმი. ბელგიის სამეფო ოჯახის პატრონაჟით ფესტივალი Europalia მთლიანად საქართველოს მიეძღვნება.

​„ქართული ოცნების“ ერთ-ერთი განსაკუთრებული პრიორიტეტია კულტურულ მემკვიდრეობაზე ზრუნვა, როგორც ქვეყნის შიგნით, ასევე მის ფარგლებს გარეთ. გაგრძელდება მასშტაბური სარეაბილიტაციო სამუშაოები და ქართული ძეგლების მსოფლიო ნუსხაში ნომინირების პროცესი. სახელმწიფო კვლავ გააგრძელებს ეროვნული იდენტობის წარმოჩენის მიზნით ქართული ​პოლიფონიური მუსიკისა და ხალხური ფოლკლორის პოპულარიზაციის ხელშეწყობას. მე როგორც ქართველ ხელოვანს კარგად მესმის ხელშეწყობისა და მოტივაციის ფასი, რადგან მე და ჩემი თაობის ხელოვანებს გამოვლილი გვაქვს მძიმე პერიოდები. ამიტომაც გამორჩეული შემოქმედებითი ნიჭისა და უნარების მქონე ახალგაზრდებისთვის სახელმწიფო გააფართოებს სასტიპენდიო ფონდებს, რაც მათ გზას გაუხსნის წარმატებისაკენ. „ქართული ოცნების“ მიერ შემუშავებული მრავალმხრივი კულტურული სტრატეგიის განვითარების პროგრამა საწინდარია საქართველოს საერთაშორისო სივრცეში განსაკუთრებული ადგილის დასამკვიდრებლად, რაც მნიშვნელოვნად დააჩქარებს ევროინტეგრაციის პროცესს. ხელოვნება აერთიანებს ერებს და კულტურული დიპლომატია ყველაზე საიმედო გარანტიაა მშვიდობისათვის“, - განაცხადა ბოლქვაძემ.