თამარ მახარაშვილი მშობლებს: „ომიკრონმა“ კიდევ უფრო მეტი გამოწვევა შემოიტანა, ამიტომ ყველას გვაქვს ჩვენი წილი პასუხისმგებლობა, გვაქვს თქვენი იმედი

განათლებისა და მეცნიერების მინისტრის პირველი მოადგილე განმარტავს რა შემთხვევაში არ უნდა გამოუშვან მშობლებმა ბავშვები სკოლაში. ამ თემაზე თამარ მახარაშვილმა „იმედის დილაში“ ისაუბრა. მან აღნიშნა, რომ სკოლებში უსაფრთხოებაზე პასუხისმგებელი პირველ რიგში განათლების სამინისტროა, რომელიც ჯანდაცვის უწყებასთან მჭიდროდ თანამშრომლობს, თუმცა ამ პროცესში მშობლების ჩართულობის მნიშვნელობასაც გაუსვა ხაზი.

„თუ კი რაიმე სიმპტომი უფიქსირდება ბავშვს - არა მხოლოდ სიცხე, თუ თავს გრძნობს შეუძლოდ, აქვს კონკრეტული სიმპტომები, რომლებსაც სულ გვახსენებს ჯანდაცვის სამინისტრო, ვიყოთ მაქსიმალურად მობილიზებულები, მაქსიმალურად ფრთხილები. მით უმეტეს, რომ სისტემა ისეა მოწყობილი, რომ კონკრეტული შეტყობინების შემდეგ სასწავლო პროცესს მიღმა არ დარჩება თქვენი შვილი. „ომიკრონმა“ კიდევ უფრო მეტი გამოწვევა შემოიტანა, ამიტომ ყველას გვაქვს ჩვენი წილი პასუხისმგებლობა და გვაქვს თქვენი იმედი“, - მიმართავს მინისტრის პირველი მოადგილე მშობლებს.

მისივე თქმით, ამ ეტაპზე ქვეყნის მასშტაბით დისტანციური სწავლა მოსწავლეთა 11%-მა აირჩია.

საქართველოს სკოლებში სასწავლო პროცესი დღეს განახლდა.