მედია: გამართლებულ რუს სპორტსმენებს ზამთრის ოლიმპიადაზე არ დაუშვებენ

ლოზანას სპორტულმა არბიტრაჟმა CAS დოპინგის მოხმარებაში ბრალდებული 43 რუსი სპორტსმენიდან 32 გაამართლა, ამათგან კი 28 სრულად გამართლდა. ახლა ყველას ყველაზე მეტად ის აინტერესებს ნიშნავს, თუ არა ეს გადაწყვეტილება ავტომატურად იმას, რომ გამათლებულ რუს სპორტსმენებს ზამთრის ოლიმპიურ თამაშებზე დაუშვებენ. ამის შესახებ რუსული მედია წერს.

სასამართლომ კონკრეტული განმარტებები არ მისცა თითოეულ სპორტსმენს, მაგრამ პრესრელიზში აღნიშნულია, რომ არბიტრები მიზნად არ ისახავდნენ რუსეთში დოპინგის სისტემის არსებობის დამტკიცებას.

როგორც გაირკვა, საბოლოო გადაწყვეტილება დაუშვებენ, თუ არა სამხრეთ კორეაში ოლიმპიურ თამაშებზე, გამართლებულ რუს სპორტსმენებს საერთაშორისო ოლიმპიურმა კომიტეტმა უნდა მიიღოს.

სააგენტო Reuters-ის ცნობით, გამართლებულ რუს სპორტსმენებს ოლიმპიადაზე მაინც არ დაუშვებენ. სპორტული საარბიტრაჟო სასამართლოს გადაწყვეტილების შემდეგ, განცხადებით გამოვიდა საერთაშორისო ოლიმპიური კომიტეტი. როგორც ირკვევა, სასამართლოს ვერდიქტი არ ნიშნავს იმას, რომ გამართლებულ სპორტსმენებს დაუშვებენ ფიონჩანგის თამაშებზე.

“ერთის მხრივ, 11 სპორტსმენის მიერ ანტისადოპინგო წესების დარღვევის დადასტურება კიდევ ერთხელ მოწმობს 2014 წელს, სოჭის ოლიმპიადაზე დოპინგთან დაკავშირებით არსებულ სისტემურ მანიპულაცებზე. მეორეს მხრივ, საერთაშორისო ოლიმპიური კომიტეტი ძალიან წუხს, რომ CAS-მა მტკიცებულებების უფრო მაღალი დონე მოითხოვა, ვიდრე ოსვალდის კომისიის მიერ წარმოდგენილი დოკუმენტები იყო. ამან, შესაძლოა, სერიოზულად იმოქმედოს მომავალში დოპინგთან ბრძოლაზე. ამიტომაც, ოლიმპიური კომიტეტი კარგად შეისწავლის CAS-ის გადაწყვეტილებას და არ გამორიცხავს, რომ შვეიცარიის ფედერალურ სასამართლოს მიმართოს.რაც შეეხება გამართლებული რუსი სპორტსმენების მონაწილეობას 2018 წლის ოლიმპიურ თამაშებში, საერთაშორისო ოლიმპიური კომიტეტის 2017 წლის 5 დეკემბრის გადაწყვეტილება ძალაში რჩება. CAS-ის ვერდიქტი არ ნიშნავს იმას, რომ ეს 28 სპორტსმენი მიწვეული იქნება ოლიმპიადაზე – სანქციების გაუქმება არ ნიშნავს ავტომატურად პრივილეგირებულ მიწვევას. ამ კონტექსტში მნიშვნელოვანია აღვნიშნოთ, რომ CAS-ის გენერალურმა მდივანმა თავის პრესკონფერენციაზე განაცხადა, რომ დღევანდელი გადაწყვეტილება არ ლაპარაკობს იმაზე, რომ ეს 28 სპორტსმენი უდანაშაულოდ გამოცხადდა”, – წერია ოლიმპიური კომიტეტის განცხადებაში. 

25 იანვარს ცნობილი გახდა, რომ ზამთრის ოლიმპიადაზე 169 რუსი სპორტსმენი მიიღებს მონაწილეობას.

გასული წლის 5 დეკემბერს, ლოზანაში, საერთაშორისო ოლიმპიური კომიტეტის (IOC) აღმასრულებელი კომიტეტის საგანგებო სხდომაზე მიღებული გადაწყვეტილებით, რუსეთის ნაკრები, ვერ მიიღებს მონაწილეობას 2018 წლის ზამთრის ოლიმპიურ თამაშებში საკუთარი დროშით.

რუს სპორტსმენებს უფლება აქვთ მხოლოდ ნეიტრალური ოლიმპიური დროშის ქვეშ ასპარეზობის. კომიტეტმა დადასტურებულად მიიჩნია ის ფაქტი, რომ რუსეთში სახელმწიფოს დონეზე შექმნეს და ხელს უწყობდნენ დოპინგის მიღების სისტემას.

ცერემონიაზე აიკრძალა რუსული ჰიმნი, მის ნაცვლად დაუკრავენ ოლიმპიურ ჰიმნს. რუსებს ფორმებზე მიაწერენ: "ოლიმპიური სპორტსმენი რუსეთიდან". 

ზამთრის ოლიმპიადა სამხრეთ კორეის ქალაქ ფიონჩანგში 2018 წლის 9-დან 25 თებერვლამდე გაიმართება.