კობიაშვილი განმარტავს თუ რა შედეგებით დასრულდება ნაკრებისთვის გულშემატკივრების არასასურველი საქციელი

საქართველოს ფეხბურთის ფედერაციის პრეზიდენტი ლევან კობიაშვილი საქართველო-ლატვიის თამაშთან დაკავშირებით გულშემატკივრებს მოუწოდებს, რომ სიმშვიდე დაიცვან და არ ჩაერთონ ისეთ ქმედებებში, რომელიც ნეგატიურად აისახება ეროვნულ ნაკრებზე, თამაშის ხარისხზე ან მატჩის მიმდინარეობაზე.

ლევან კობიაშვილის განცხადებით, მატჩს აკვირდება UEFA-ს დელეგატი, რომელსაც თამაშის შეწყვეტა შეუძლია, რაც კობიაშვილის თქმით, ეროვნული ნაკრებისთვის "კატასტროფა" იქნება.

"ნებისმიერი არასპორტული საქციელი, რომელმაც შეიძლება რაიმე სახის ნეგატივი გამოიწვიოს, შესაძლოა ძალიან მკაცრად იქნას შეფასებული, ამას დელეგატი წყვეტს... მას შეუძლია ასევე თამაშის ჩაშლა, თამაშის შეწყვეტა, რაც კატასტროფა იქნება ჩვენთვის. ჩვენ ეს არ გვჭირდება. დარწმუნებული ვარ, რომ გულშემატკივარი გაითვალისწინებს თავის პასუხისმგებლობას და მოვა იქ იმიტომ, რომ ჩვენ ნაკრებს დაუდგეს გვერდში", - თქვა ლევან კობიაშვილმა.

თამაშთან დაკავშირებით მიმართვა გაავრცელა დღეს ეროვნული ნაკრების ვიცეკაპიტანმა გურამ კაშიამაც. 

საქართველოს საფეხბურთო ნაკრები დღეს ლატვიის ნაკრებს დაუპირისპირდება. შეხვედრა “დინამო არენაზე” 20:00 საათზე დაიწყება.

ასევე შსს საქართველო-ლატვიის მატჩზე დასწრების მსურველებს აფრთხილებს. თბილისის მერმა კახა კალაძემ, 9 სექტემბერს, ბორის პაიჭაძის სახელობის სტადიონზე დადგეგმილ საქართველო-ლატვიის მატჩთან დაკავშირებით მიმართვა გაავრცელა. კალაძე საზოგადოებას საქართველოს ნაკრების მხარდაჭერისკენ მოუწოდებს.

ცოტა ხნის წინ ცნობილი გახდა, რომ „ქართული მარში“ დინამო არენასთან დაგეგმილ აქციას აუქმებს.

„მოვუწოდებთ ყველა ლგბტ-პროვოკატორს - ნუ გაიკეთებენ 9 სექტემბერს მამათმავლობის სიმბოლოს, ლგბტ სამკლაურებს. იმის გამო, რომ ჩვენმა ნაკრებმა როგორც იქნა მატჩი მოიგო და გაუჩნდა შანსი ითამაშოს შემდეგ ეტპზე, იმის გამო, რომ საქართველოს ნაკრებს ხელი არ შეეშალოს, ჩვენ მზად ვართ გავაუქმოთ ყველა აქცია და პერფორმანსი, რომელიც დაგეგმილი გვქონდა გურამ კაშიას ამაზრზენი ქმედების გასაპროტესტებლად,"- წერია განცხადებაში.

გურამ კაშიას მიმართ საზოგადოების გარკვეულმა ნაწილმა აგრესია მას შემდეგ გამოხატა, რაც გასულ სეზონში ჰოლანდიის კლუბ „ვიტესში“ თამაშისას, მან საჯაროდ მხარი დაუჭირა თანასწორობის იდეას და ჰოლანდიის ყველა სხვა კლუბის კაპიტნის მსგავსად, ლგბტ თემის მხარდამჭერი სამკლაური გაიკეთა, რის გამოც გულშემატკივრების ნაწილის კრიტიკა დაიმსახურა. ფეხბურთელმა მათ კრიტიკას უპასუხა. მოგვიანებით, კი სამკლაურის გაკეთების მიზეზი კიდევ ერთხელ განმარტა.

გურამ კაშიას მხარდაჭერა გამოუცხადეს ფეხბურთის ფედერაციამ, ფედერაციის პრეზიდენტმა ლევან კობიაშვილმა, თბილისის მერმა კახა კალაძემ, კოლეგებმა და სპორტულმა ჟურნალისტებმა.

გურამ კაშიას მხარდაჭერა გამოუცხადა საქართველოს პრეზიდენტმა გიორგი მარგველაშვილმაც.

ფეხბურთელის წინააღმდეგ 31 ოქტომბერს ფეხბურთის ფედერაციასთან ქართულმა მარშმა საპროტესტო აქცია გამართა, რომელზეც მარშის წევრები პოლიციას დაუპირისპირდნენ.