რატომ ჩაიცვა მელანია ტრამპმა სკანდალური მოსასხამი. ვერსიები

აშშ-ის პირველი ლედი მელანია ტრამპი, არალეგალი მიგრანტი ბავშვების მოსანახულებლად, მექსიკის საზღვარზე 21 ივნისს ჩავიდა. მედიისა და სოციალური ქსელების მომხმარებლების ყურადღების ცენტრში კი მოექცა ტანსაცმელი, რომელიც მელანია ტრამპმა შეხვედრისთვის შეარჩია. 

აშშ-ის პირველ ლედის ეცვა მოსასხამი, რომელსაც ეწერა: „მე ნამდვილად არ მადარდებს. შენ?“. მას შემდეგ ბევრი ვერსია ვრცელდება იმის თაობაზე, თუ რისი თქმა სურდა ამით პირველ ლედის. BBC-ის რუსულენოვანმა ბიურომ კი ეს ვერსიები გააერთიანა.

1. ეს მხოლოდ ქურთუკია

პირველი ვერსიით, Zara-ს მაღაზიაში ნაყიდი 39-დოლარიანი ქურთუკი არაინაირი კონკრეტული მესიჯის შემცველი არ იყო და მელანიამ ის ტეხასისკენ გზად შეიძინა. თუმცა, ოპონენტები თვლიან, რომ ვაშიგტონში ამ დროს საკმაოდ ცხელოდა.

გარდა ამისა, ამბობენ იმასაც, რომ ამერიკის შეერთებული შტატების პრეზიდენტი დონალდ ტრამპი სწორედ მელანიამ დაარწმუნა და მან რამდენიმეკვირიანი კამათის შემდეგ, 21 ივნისს, ხელი მოაწერა განკარგულებას, რომელიც კრძალავს მიგრანტების ოჯახის წევრთა დაშორებას საზღვარზე. ამიტომ საზღვრის არალეგალურად გადაკვეთის გამო დაკავებული მშობლები შესაბამის დაწესებულებაში შვილებთან ერთად იქნებიან.

„ძნელია იმის ყურება, როგორ აშორებენ არალეგალ ბავშვებს მშობლებს და ოჯახებს“- განაცხადა მელანია ტრამპმა და აღნიშნა, რომ შეერთებულ შტატებს უფრო წარმატებული საიმიგრაციო პოლიტიკა სჭირდება.

2. ეს იყო გზავნილი ქმრისთვის

ჟურნალისტ მაიკლ ვულფის წიგნის „ცეცხლი და მრისხანება“მიხედვით, მელანიასა და დონალდს საკმაოდ დაძაბული ურთიერთობა აქვთ და ერთამენთს იშვიათად ნახულობენ. ამავე ინფორმაციით, მელანიას არ გახარებია აშშ-ის საპრეზიდენტო არჩევნებში მეუღლის გამარჯვება და არც ვაშინგტონში, თეთრ სახლში საცხოვრებლად გადასვლა უნდოდა. ურთიერთობა კი განსაკუთრებით ტრამპის პორნოვარსკვლავთან დაკავშირებული სკანდალის შემდეგ დაიძაბა. დონალდ ტრამპისა და პორნომსახიობის ურთიერთობაზე სკანდალის გამო, მელანია დავოსშიც არ წავიდა.

მელანია კი ამ ხნის განმავლობაში, ქმრის ქმედებების გამო, პროტესტს დუმილით გამოხატავდა.

ამ ვერსიის მხარდამჭერები ამბობენ, რომ მელანიმ გამოიყენა შემთხვევა და თავისდ პოზიცია მოსასხამით დააფიქსირა. მან მეუღლის საიმიგრაციო პოლიტიკა გააკრიტიკა და აგრძნობინა, რომ ოჯახების დაყოფა ტრამპის გადასაწყვეტი არაა, ეს თეორია განსაკუთრებით პოპულარულია სოციალურ ქსელებში, სადაც მოძრაობაა "გათავისუფლდეს მელანია. " მისი მიმდევრები დარწმუნებულნი არიან, რომ პრეზიდენტის მეუღლე უკმაყოფილოა ქორწინებით.

3. ტრამპი: მელანიას სამიზნე მედია იყო

ამერიკის შეერთებული შტატების პრეზიდენტმა დონალდ ტრამპმა მელანია ტრამპის ჩაცმულობის შესახებ, რომელიც კრიტიკის საგანი გახდა, კომენტარი გააკეთა. 

როგორც ტრამპი წერს, მელანის სამიზნე ის მედია საშუალებები იყვნენ, რომლებიც ცრუ ინფორმაციას ავრცელებენ. ასეთებად ტრამპი თეთრი სახლის კრიტიკით გამორჩეულ მედიას მიიჩნევს. თუმცა, ოპონენტები თვლიან, რომ ეს ტრამპის მხრიდან თავის მართლებას ჰგავდა.

4. გზავნილი მოდის ინდუსტრიას

ქურთუკი, რომელიც მელანიამ ჩაიცვა Zara-ს ორი წლის წინანდელი კოლექციიდანაა, რომელიც ახლა აღარ იშოვება.

ესპანური ტანსაცმლის მწარმოებელი არაერთხელ გააკრიტიკეს აფრიკის ქვეყნებში ბავშვთა შრომის გამოყენების, აგრეთვე ქარხნებში დაბალი ხელფასებისა და ცუდი სამუშაო პირობების გამო. თუმცა, ჰოლდინგი Inditex-ი, რომელშიც შედის: Zara, Pull&Bear, Bershka და Stradivarius-ი ბაზრის ლიდერებას რჩებიან.

სოციალურ ქსელებში დაიწყეს იმაზე მსჯელობა, როგორი უნდა ყოფილიყო მელანია ტრამპის ქურთუკი. ინტერნეტში ვრცელდება სხვადასხვა დიზაინერის მიერ შექმნილი ახალი ვერსიები. 

ვერსიები მედიაში ბევრია, მაგრამ სიმართლე მხოლოდ მას შემდეგ გაირკვევა რაც მელანია ტრამპი ამ საკითხზე კომენტარს გააკეთებს, თუმცა აშშ-ის პირველი ლედი ჯერჯერობით დუმს.