ვაშაძე: მე ვიყავი საბჭოთა დიპლომატი და ვამაყობ ამით

"ნაციონალური მოძრაობის" საპრეზიდენტო კანდიდატი გრიგოლ ვაშაძე ამაყობს, რომ ის საბჭოთა კავშირის დიპლომატი იყო. ამის შესახებ მან Deutsche Welle-სთან ინტერვიუში თქვა.

ჟურნალისტმა გრიგოლ ვაშაძეს მისი და მისი ოპონენტის დიპლომატიურ ურთიერთობებზე ჰკითხა: "თქვენ ორივე საგარეო საქმეთა მინისტრები იყავით, თუმცა ზურაბიშვილი ფრანგი დიპლომატია, თქვენ კი საბჭოთა. ეს თქვენთვის პრობლემაა?"

ამ შეკითხვაზე გრიგოლ ვაშაძემ უპასუხა, რომ საბჭოთა კავშირის დიპლომატად მუშაობით მან "ფანტასტიკური სკოლა" გაიარა.

„არანაირი პრობლემა არ მაქვს. ვიყავი საბჭოთა დიპლომატი და ამით ვამაყობ და ფანტასტიკური სკოლა გავიარე. ე.წ. „ქართული ოცნება“ და ივანიშვილის ტელეარხები ცდილობენ ჩემი ბიოგრაფიით ითამაშონ და ამბობენ, რომ მე კა-გე-ბეს აგენტი ვარ. ეს არ მუშაობს", - განაცხადა ვაშაძემ.

კითხვაზე, გამარჯვების შემთხვევაში შეხვდება თუ არა ვლადიმერ პუტინს, ვაშაძე პასუხობს: „არა, იმიტომ, რომ არ ვიცი, როგორი იქნება კრემლის რეაქცია. საქართველომ თავისი დამოუკიდებლობით რუსეთს კავკასიაში სტრატეგიული როლი წაართვა, რუსეთი კი მის დასაბრუნებლად იბრძვის. თუმცა პრობლემა ისაა, რომ ოკუპირებული ტერიტორიები - ეს რუსული პრობლემის მოგვარება არაა".

გრიგოლ ვაშაძემ Deutsche Welle-სთან ინტერვიუში საქართველოს ეკონომიკურ მდგომარეობაზეც გააკეთა განცხადებები. 

ვაშაძემ ასევე შეაფასა საპრეზიდენტო არჩევნების პირველი ტურის შედეგები, ისაუბრა სააკაშვილის და ყოფილი ხელისუფლების სხვა მაღალჩინოსნებისი შეწყალებაზე, ასევე მიხეილ სააკაშვილის მომავალ პოლიტიკურ ცხოვრებაზე. ამასთან პრეზიდენტობის კანდიდატის თქმით, ის სააკაშვილისგან დამოუკიდებელია.

შეგახსენებთ, რომ „ნაციონალური მოძრაობის“ საპრეზიდენტო კანდიდატის, გრიგოლ ვაშაძის წინასაარჩევნო კამპანია წარმოშობით ბელარუსმა პოლიტტექნოლოგმა ვიტალი შკლიაროვმა და რუსეთის მოქალაქეებმა წარმართეს. 7 კაციანი PR-ჯგუფი არჩევნების პირველი ტურის შედეგებს ვაშაძის შტაბში რუსული შეძახილებით ზეიმობდა. რუსეთის ყოფილი მოქალაქე გრიგოლ ვაშაძე და მისი პოლიტიკური ჯგუფი ამაში პრობლემას ვერ ხედავენ და ამტკიცებენ, რომ ოკუპანტი ქვეყნის პროექტს არა ისინი, არამედ მათი მთავარი ოპონენტი წარმოადგენს.