ზურაბიშვილი ზვიად გამსახურდიას მკვლელობის საქმეზე სპეციალურ განცხადებას ავრცელებს

სალომე ზურაბიშვილი პარლამენტს მიმართავს, გაითვალისწინოს თხოვნა, რომ ზვიად გამსახურდიას მკვლელობის გამოძიების ხანდაზმულობის ვადა გაგრძელდეს. ამის შესახებ წერია განცხადებაში, რომელსაც საქართველოს პრეზიდენტის პრესსამსახური ავრცელებს.

"როგორც საქართველოს პრეზიდენტმა, არ შეიძლება, არ გავიზიარო ზვიად გამსახურდიას ოჯახის წუხილი და მოთხოვნა, გაგრძელდეს საქართველოს პირველი პრეზიდენტის ზვიად გამსახურდიას მკვლელობის გამოძიების ხანდაზმულობის ვადა. ვიცი, რომ ამისათვის საჭიროა შესაბამისი საკანონმდებლო ღონისძიებების გატარება, ეს კი პრეზიდენტის კომპეტენცია არ არის. მივმართავ საკანონმდებლო ორგანოს, შესაძლებლობის ფარგლებში გაითვალისწინონ ჩემი და ზვიად გამსახურდიას ოჯახის წევრების თხოვნა ამ საკითხთან დაკავშირებით", - წერს ზურაბიშვილი.

მანამდე კონსტანტინე და ცოტნე გამსახურდიებმა პრესკონფერენციაზე აღნიშნეს, რომ უნდა შეიქმნას საპარლამენტო საგამოძიებო კომისია, რომელიც ზვიად გამსახურდიას მკვლელობის საქმეზე უშედეგო გამოძიებაში დამნაშავე პირების პასუხისმგებლობის საკითხს დაადგენს.

ასევე ისინი საკანონმდებლო ნორმის ცვლილებას მოითხოვენ, რომლის მიხედვითაც, სახელმწიფო მეთაურების და მაღალი თანამდებობის პირების საქმეებზე ხანდაზმულობის 25-წლიანი ვადა უნდა გაუქმდეს და უვადო გახდეს.

ამასთან, პირველი პრეზიდენტის შვილები დიპლომატიურ კორპუსს ზვიად გამსახურდიას საქმეზე მიმდინარე გამოძიებით დაინტერესებისკენ მოუწოდებენ. როგორც ცნობილია, ზვიად გამსახურდიას საქმეზე გამოძიებას, რომელიც განზრახ მკვლელობის მუხლით მიმდინარეობს, ვადა 31 დეკემბერს ეწურება.

კონსტანტინე და ცოტნე გამსახურდიები პროკურატურის საზოგადოებრივი მისაღების შენობაში შიმშილობენ. 

საქართველოს პირველი პრეზიდენტი, ზვიად გამსახურდია 1993 წლის 31 დეკემბერს, გამთენიისას, სამეგრელოს სოფელ ხიბულაში გაურკვეველ ვითარებაში გარდაიცვალა.