უზენაესის მოსამართლეობის კანდიდატებზე პარლამენტისგან პოზიციის დაფიქსირებას ითხოვენ

იუსტიციის უმაღლესი საბჭოს არამოსამართლე წევრი ნაზი ჯანეზაშვილი პარლამენტს უზენაესი სასამართლოს მოსამართლეთა 10-კაციანი სიის მხარდაჭერისგან თავის შეკავებისკენ მოუწოდებს. საიას ხელმძღვანელი სულხან სალაძე კი საკანონმდებლო ორგანოს ამ საკითხზე მკვეთრი პოზიციის დაფიქსირებას სთხოვს და მოსამართლეების დანიშვნამდე საკანონმდებლო ცვლილებებს ითხოვს. ინფორმაციას სააგენტო "ინტერპრესნიუსი" ავრცელებს.

იუსტიციის საბჭოს წევრის, ნაზი ჯანეზაშვილის თქმით, დღეისათვის ყველაზე აქტუალური სასამართლო სისტემაში უზენაესი სასამართლოს მოსამართლეების არჩევაა. მისი თქმით, ბევრ რამეს გადაწყვეტს ის, თუ როგორ და ვის აირჩევენ.

"არ უნდა დავუშვათ ჩინჩალაძის კლანის გაძლიერება. უზენაეს სასამართლოში როდესაც დასრულდება ეს ეტაპი და სასამართლოში ღირსეული ადამიანები შევლენ, შემდეგ შეგვეძლება სხვა რეფორმებზე მუშაობის გაგრძელება. უზენაესი სასამართლოს გადარჩენაზე უნდა ვიზრუნოთ ყველამ.

პარლამენტს შეუძლია მხარი არ დაუჭიროს ამ სიას. კანონის თანახმად, ერთი და იმავე კანდიდატურის წარდგენა შესაძლებელია მხოლოდ ორჯერ", - განაცხადა ნაზი ჯანეზაშვილმა.

საიას ხელმძღვანელი სულხან სალაძე კი მიიჩნევს, რომ სიის განხილვამდე პარლამენტმა საკანონმდებლო ცვლილებები უნდა განახორციელოს, რომელიც მოსამართლეების ასარჩევად შესაბამის კრიტერიუმებსა და სტანდარტებს დაადგენს.

"აუცილებელია ჯერ ამ კრიტერიუმების დადგენა და სწორედ ამის შემდგომ უნდა მოხდეს სიის წარდგენა საკანონმდებლო ორგანოში. მთავარი და მნიშვნელოვანია დავინახოთ რას აპირებს პარლამენტი. ამ შემთხვევაში ვგულისხმობთ „ქართულ ოცნებას“, რადგან ის არის მმართველი ძალა. თუ პარლამენტის გადაწყვეტილება იქნება, რომ დაუყოვნებლივ უნდა დაიწყოს მუშაობა იმ ცვლილებებზე, რომელიც ორგანულ კანონში განსაზღვრავს კონკრეტულ კრიტერიუმებსა და სტანდარტებს, ამის შემდგომ უნდა მოხდეს სიის ხელახლა წარდგენა პარლამენტში.

სიის უკან გაწვევა იუსტიციის უმაღლესი საბჭოს მხრიდან შეაჩერებს პროცესს. თუმცა, იმ შემთხვევაშიც კი, თუ არ მოხდება იუსტიციის უმაღლესი საბჭოს მხრიდან სიის გაწვევა, პარლამენტმა მკაფიოდ უნდა დააფიქსიროს თავისი პოზიცია და თქვას, რომ უნდა მოხდეს საკანონმდებლო ცვლილებები, კონკრეტული კრიტერიუმებისა და სტანდარტების განსაზღვრა და სწორედ ამის შემდგომ სიის განხილვა. ოღონდ, ეს სია უნდა ეფუძნებოდეს უკვე ახალ სტანდარტებს", - განაცხადა სულხან სალაძემ.

უზენაესი სასამართლოს მოსამართლეთა 10-კაციანმა სიამ საპარლამენტო უმრავლესობაში დაპირისპირება გამოიწვია. როგორც ეკა ბესელია ამბობს, პარლამენტში ამ სიის განხილვის პროცესის შესაჩერებლად მან იურიდიულ საკითხთა კომიტეტის თავმჯდომარის თანამდებობა დატოვა. თუმცა ამ განცხადებას არ ეთანხმება პარლამენტის თავმჯდომარე ირაკლი კობახიძე, ის ამბობს, რომ სიის განხილვის შეჩერება ბესელიას მიერ პოსტის დატოვებას არ შეეძლო. 

შექმნილ ვითარებასთან დაკავშირებით მმართველ გუნდში შეხვედრაა დანიშნული, თუმცა უცნობია როდის გაიმართება. 

24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.