ვაკის პარკში ომბუდსმენის სიტყვიერი შეურაცხყოფისთვის კიდევ 1 პირი დააკავეს

ვაკის პარკში, სახალხო დამცველ ნინო ლომჯარიას სიტყვიერი შეურაცხყოფისთვის შსს-მ კიდევ ერთი ადამიანი დააკავა. ამის შესახებ ინფორმაციას შინაგან საქმეთა სამინისტრო ავრცელებს.

უწყების ცნობით, 1984 წელს დაბადებული ვ.მ. და 1964 წელს დაბადებული ლ.ა. ადმინისტრაციულ სამართალდარღვევათა კოდექსის 166 - ე მუხლით დააკავეს, რაც წვრილმან ხულიგნობას გულისხმობს. 

ვაკის პარკში მისულ ზაზა სარალიძეს თან ომბუდსმენი ნინო ლომჯარია ახლდა. აქციის მონაწილეები ლომჯარიას დაუპირისპირდნენ. მათი აზრით, სახალხო დამცველმა დაარწმუნა სარალიძე, დაეტოვებინა აქცია.

ვაკის პარკში აქცია „აღდგეს სამართლიანობა პოლიტიკოსების გარეშე“ გაიმართა. ორგანიზატორების თქმით, აქცია 4 ივნისიდან განახლდება. 

გუშინ ვაკის პარკში მიმდინარე აქციას ხორავას ქუჩაზე მოკლული ერთ-ერთი არასრულწლოვნის მამა შეუერთდა, თუმცა სარალიძემ ტერიტორია სახალხო დამცველთან, ნინო ლომჯარიასთან ერთად მალევე დატოვა. მანამდე აქციის მონაწილეებსა და ომბუდსმენს შორის დაპირისპირება მოხდა.

პარალელურად აქცია მიმდინარეობს რუსთაველის გამზირზე, რომელშიც პოლიტიკური პარტიები მონაწილეობენ. „ნაციონალური მოძრაობამ“ და სხვა ოპოზიციურმა პოლიტიკურმა პარტიებმა განაცხადეს, რომ ისინი გაერთიანებული ძალებით აპირებენ სისტემის წინააღმდეგ ბრძოლას.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა.  პროკურატურა განაჩენს სააპელაციოში გაასაჩივრებს.

31 მაისვე, დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

საგანგებო ბრიფინგი გამართა პრემიერმინისტრმა გიორგი კვირიკაშვილმა, რომელმაც განაცხადა, რომ ხორავას ქუჩაზე მკვლელობის საქმეს შინაგან საქმეთა სამინისტრო დაიბრუნებს გამოძიებაში და მას პირადად გიორგი გახარია უხელმძღვანელებს.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.