EBRD-ი საქართველოში 3 მილიონი ევროს ინვესტიციის განხორციელებას გეგმავს

თბილისში მიმდინარე აბრეშუმის გზის ფორუმის ფარგლებში საქართველოს პირველმა ვიცეპრემიერმა, დიმიტრი ქუმსიშვილმა ევროპის რეკონსტრუქციისა და განვითარების ბანკის ვიცეპრეზიდენტთან, ალან პიუსთან ორმხრივი შეხვედრა გამართა. 

მხარეებმა ფორუმის მნიშვნელობა შეაფასეს და ისაუბრეს იმ პროექტებზე, რომელსაც EBRD ქართულ მხარესთან აქტიური თანამშრომლობით ახორციელებს.

როგორც ალან პიუმ შეხვედრაზე აღნიშნა, აღმოსავლეთ და ცენტრალურ ევროპაში საქართველო მეორე ტალღის რეფორმების ლიდერია. მისი განცხადებით, საქართველოს პროგრესი, მისი მთავრობის საქმიანობა და რეფორმები, ასევე ღია ბაზარი და თავისუფალი სავაჭრო ხელშეკრულებები სხვადასხვა ქვეყნებთან ძალიან მნიშვნელოვანი და მისასალმებელია.

შეხვედრაზე ითქვა, რომ EBRD-ი წელს ეკონომიკის სხვადასხვა სექტორში 3 მილიონი ევროს ოდენობის ინვესტიციის განხორციელებას გეგმავს . 

პირველი ვიცეპრემიერის განცხადებით, EBRD-ი საქართველოში ძალიან მნიშვნელოვან პროექტებს ახორციელებს, რომელთა საინვესტიციო მოცულობა ასეულობით მილიონი ევროა.

როგორც დიმიტრი ქუმსიშვილმა აღნიშნა, აბრეშუმის გზის ფორუმი, რომლის ერთ-ერთი სპონსორი სწორედ ევროპის რეკონსტრუქციისა და განვითარების ბანკია, არის საუკეთესო პლატფორმა იმისთვის, რომ საერთაშორისო საფინანსო ორგანიზაციების მხრიდან კიდევ უფრო მეტი, მნიშვნელოვანი პროექტი განხორციელდეს საქართველოში.

თბილისის „აბრეშუმის გზის ფორუმი“ მისასალმებელი პანელით „მაღალი დონის დიალოგი: სარტყელი და გზის კავშირი სტაბილურობისათვის“ გუშინ გაიხსნა. ფორუმს 60-ზე მეტი ქვეყნის 2000-მდე დელეგატი ესწრება.