ამერიკული სანქციების გამო, რუსულ კომპანია „რუსალს“ ხელმძღვანელები ტოვებენ

თანამდებობიდან გადადგა რუსეთის ერთ-ერთი უმსხვილესი კომპანიის, ალუმინის მწარმოებელი „რუსალის“ გენერალური დირექტორი ალექსანდრა ბურიკო. ამის მიზეზია სანქციები, რომლებიც აშშ-მა დაუწესა „რუსალს“ და მის უმსხვილეს აქციონერს, ოლეგ დერიპასკას. ინფორმაციას რადიო თავისუფლება ავრცელებს.

სანქციების გამო, მსოფლიო ბაზარზე მნიშვნელოვნად გაუფასურდა ამ კომპანიის აქციები. „რუსალის“ ოფიციალურ ვებსაიტზე გამოქვეყნებული ინფორმაციით, 28 ივნისს თანამდებობებს დატოვებს დირექტორთა საბჭოს კიდევ 7 წევრი.

რუსალის“ განცხადებით, კომპანია მისი აქციონერების ინტერესებიდან გამომდინარე, მეორე თვეა აწარმოებს დიალოგს აშშ-ის ხელისუფლებასთან, რათა მიაღწიოს 6 აპრილს დაწესებული სანქციების გაუქმებას და ამ პროცესში ერთ-ერთი ნაბიჯია კომპანიის ხელმძღვანელების გადადგომა.

18 მაისს, რუსმა მილიარდერმა ოლეგ დერიპასკამ დატოვა „რუსალის“ უმსხვილესი აქციონერის, კომპანია „ენ პლუსის“ დირექტორთა საბჭო. მანამდე, 23 აპრილს აშშ-ის ფინანსთა სამინისტრომ განაცხადა, რომ შეისწავლის „რუსალისთვის“ დაწესებული სანქციების შეჩერების საკითხს, თუ დერიპასკა შეწყვეტს ამ კომპანიის გაკონტროლებას.

6 აპრილს, ამერიკის შეერთებულმა შტატებმა რუს ოლიგარქებს სანქციები დაუწესა. მათ შორის ლაპარაკია, ოლეგ დერიპასკაზე, იგორ როტენბერგსა და კირილ შამალოვზე.

ეს სია ვაშინგტონის საპასუხო რეაქციაა, 2016 წლის ამერიკის შეერთებული შტატების საპრეზიდენტო არჩევნებში რუსეთში შესაძლო ჩარევის გამო.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.