ხაზარაძე: ანაკლიის პროექტზე კაბალური ხელშეკრულება გაგვაფორმებინეს

"თიბისი ბანკის" დამფუძნებელმა მამუკა ხაზარაძემ პარლამენტის საფინანსო-საბიუჯეტო კომიტეტის სხდომაზე ანაკლიის პროექტთან დაკავშირებითაც გააკეთა კომენტარი. მამუკა ხაზარაძის განცხადებით, წინა პრემიერმინისტრის (გიორგი კვირიკაშვილი) დროს "პრაქტიკულად, კაბალურ ხელშეკრულებაზე მოგვაწერინეს ხელი, ბევრი სპეკულაცია იყო, თითქოს, ვიღაც დაგვეხმარა, მაგრამ პირიქით". მის განცხადებას 1tv.ge ავრცელებს.

მამუკა ხაზარაძის განცხადებით, მათ კორპორაციასა და სახელმწიფოს შორის ხელშკერულებაზე ორი იურიდიული კომპანია მუშაობდა. 

"სახელმწიფოს მხრიდან 2016 წელს მუშაობდა „დეკერსი“. ხელშეკრულება დაგვიდეს, გახსოვთ ვინ იყო იმ დროს პრემიერი, გახსოვთ ეკონომიკის მინისტრი. ჩვენ გვაბრალებდნენ, თითქოს, რაღაც საჩუქარი მივიღეთ. მესმის მათი პოზიცია, მათ სახელმწიფოებრივი ინტერესები დაიცვეს ისე მკაცრად, რომ არც ერთი ნორმალური ბიზნესმენი მას ხელს არ მოაწერდა“, – განაცხადა მამუკა ხაზარაძემ.

ხაზარაძის განმარტებით, ამ ხელშეკრულებაში დამფინანსებელი ბანკებისთვის, ოთხი ბანკისთვის, რომელიც 400 მილიონ დოლარზე მუშაობს, რვა პუნქტი მიუღებელია:

„ნოთ ბენქებელ“ არის სიტყვა, „ნოთ ბენქებელ“ სიტუაციაში, ისინი შეხვდნენ მთავრობას რამდენიმე კვირის წინ. მთავრობამ უთხრა, მოეცათ წერილობითი ფორმით, აღნიშნული რვა პუნქტი გამზადებულია. ეს ჩვენი მოთხოვნა არ არის, ეს არის დამფინანსებლების მოთხოვნა, რადგან ასეთი ტიპის ხელშეკრულებები არ მუშაობს. მესმის, რატომ მოგვაწერინეს ხელი მაშინ, რომ არ მოგვეწერა ხელი, ახლა აქ არ ვიქნებოდით. ამიტომ, ჩვენ ეს რისკი ავიღეთ“, – განაცხადა მამუკა ხაზარაძემ.

მამუკა ჯაფარიძის საქმესთან დაკავშირებით, თებერვლის შუა რიცხვებში საქართველოს ეკონომიკური გუნდის მინისტრებმა განაცხადეს, რომ ანაკლიის პროექტი და თიბისის საქმე უნდა გაიმიჯნოს. მაშინ ფინანსთა მინისტრმა ივანე მაჭავარიანმა კატეგორიულად გამორიცხა „თიბისი ბანკის" საქმისა და ანაკლიის პროექტის ერთმანეთთან დაკავშირება. ეკონომიკის მინისტრის, გიორგი ქობულიას თქმით კი ანაკლიის პროექტს მთავრობის სრული მხარდაჭერა აქვს და ხაზარაძე უბრალოდ შემსრულებელია.

დღეს მამუკა ხაზარაძეს და ბადრი ჯაფარიძეს პარლამენტში, საფინანსო-საბიუჯეტო კომიტეტის სხდომაზე მოუსმინეს.

21 თებერვალს ცნობილი გახდა, რომ „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეო სქემა, რომლითაც „თიბისი ბანკის“ საქმე აღწერა.