საფრანგეთის ელჩი: პანდემიაზე რეაგირების კუთხით საქართველოს მთავრობამ და საზოგადოებამ ყველა აღაფრთოვანა

საქართველოში პანდემიის საპასუხოდ ძალიან კომპეტენტურმა და გამჭვირვალე რეაგირებამ დიდი წარმატება აჩვენა და მსოფლიოს დაანახა ქვეყნის ძალიან პოზიტიური იმიჯი, ვფიქრობ, ყველამ იცის, რომ ეფექტური თანამშრომლობა საერთაშორისო ორგანიზაციების ფარგლებში უმთავრესია - ამის შესახებ საფრანგეთის ელჩი ჟურნალ „დიპლომატთან“ ინტერვიუში საუბრობს.

„აშკარაა, რომ უსაფრთხოება, კეთილდღეობა, ჯანმრთელობა გარანტირებულია მხოლოდ იმ შემთხვევაში, თუ ქვეყნები ერთად მუშაობენ და ამისათვის მათ სჭირდებათ ძლიერი საერთაშორისო ორგანიზაციები.

აქედან გამომდინარე, ერთმანეთის დასახმარებლად ერთი გზაა მულტილატერალიზმის - გაეროს სისტემის გაძლიერება, ჯანდაცვის საკითხების გლობალური მმართველობა. აპრილის დასაწყისში პრეზიდენტი მაკრონი დაეხმარა Alliance ACT Accelerator-ის ამოქმედებას, რათა საყოველთაო ვაქცინაციის შესაქმნელად გამოკვლევები დაეფინანსებინა.

ეს იყო წარმატება, რადგან მობილიზდა 7,5 მილიარდი დოლარი. ასევე პარიზის ნოემბრის სამშვიდობო ფორუმზე ყურადღება ძირითადად დაეთმობა გლობალური მმართველობის საკითხებს ჯანდაცვის სფეროში და ეკონომიკური რეკონსტრუქციის საკითხებს განვითარების ბანკების პირველ სამიტზე.

შემდეგ მოდის უფრო ტრადიციული თანამშრომლობა ჯანდაცვის სფეროში. როგორც „გუნდი ევროპის“ წევრმა, ვთვლი, რომ საფრანგეთმა, ევროკავშირთან და სხვა წევრ სახელმწიფოებთან ერთად შეძლო სწრაფი დახმარება, დაფინანსება და მიმართულების მიცემა, რათა მნიშვნელოვანი წვლილი შეეტანა იმ შესანიშნავ რეაგირებაში, რომლითაც საქართველოს მთავრობამ და საზოგადოებამ ასე აღაფრთოვანა ყველა. ჩვენ აუცილებლად მივაღწევთ იმავე შეხედულების ერთობას პანდემიის ეკონომიკური შედეგების წინააღმდეგ ბრძოლაში“, - აღნიშნავს დიეგო კოლასი.

რა გავლენას იქონიებს კრიზისი საფრანგეთსა და საქართველოს ეკონომიკურ ურთიერთობებზე, ელჩი პასუხობს:

„მე ვფიქრობ, რომ კრიზისი აჩვენებს მსოფლიოს, თუ რამდენად კომპეტენტური და გამჭვირვალეა ანუ, რამდენად ევროპულია საქართველო. ეს ნამდვილად გაზრდის ინტერესს ამ ქვეყნის მიმართ და, შესაბამისად, გაამყარებს კავშირებს ფრანგ და ქართველ იმპორტიორებს, ექსპორტიორებსა და ინვესტორებს შორის.

ჩვენ დავინახეთ, რომ კრიზისის შუა პერიოდში ზოგი ბიზნესი ხელახლა ფიქრობდა თავიანთ მოწყობასა და განსაკუთრებით იმაზე, თუ საით გადაეტანათ თავისი წარმოება - რეგიონული თუ აღმოსავლეთ ევროპის ბაზრებისკენ. ისიც ნათელი იყო, რომ საქართველოს ჰქონდა არგუმენტები გადაწყვეტილების მიმღები პირების დასარწმუნებლად, რომ სწორედ საქართველოში მოეხდინათ ინვესტირება და საკუთარი ბიზნესი ამ ქვეყანაში გაეფართოებინათ.

საქართველოში არის საქმიანი მეგობრული გარემო. მთავრობა და ფართო საზოგადოება ყურადღებით აკვირდებიან საერთაშორისო პარტნიორების საჭიროებებს. მოქმედებს თავისუფალი ვაჭრობის ხელშეკრულებები. ეკონომიკის მინისტრთან ერთად ახლახან მოვინახულე ჩვენი ერთ-ერთი ყველაზე დიდი ინვესტორის, Groupe Atlantic-ის, ქარხანა ქუთაისში. ისინი შექმნიან სამუშაო ადგილებს და უფრო მეტ სასწავლო შესაძლებლობას მომდევნო თვეებში. მე ვფიქრობ, დღეს ჩემი საქმიანობის მნიშვნელოვანი ნაწილია, ხელი შევუწყო ამ წარმატებული პარტნიორობის განვითარებას“, - აცხადებს დიეგო კოლასი.